कांग्रेस मकवानपुरद्वारा सिडियोमार्फत प्रधानमन्त्रीलाई ज्ञापनपत्र

४ साउन, हेटौंडा । नेपाली कांग्रेस मकवानपुरले विभिन्न समसामयिक राष्ट्रिय विषयमा सरकारको ध्यानाकर्षण गराउँदै मकवानपुरका प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाएको छ । कांग्रेस मकवानपुर जिल्ला सभापति बुद्ध लामाको नेतृत्वको टोलीले प्रमुख जिल्ला अधिकारी बसन्त अधिकारीमार्फत प्रधानमन्त्री बालेन्द्र शाहलाई ज्ञापनपत्र बुझाएको हो ।
बुझाइएको ज्ञापनपत्रमा प्रधानमन्त्रीले संसदमा दिएको ‘नेपालले पनि भारतीय भूमि मिचेको छ’ भन्ने अभिव्यक्तिबारे स्पष्ट पार्न वा उक्त अभिव्यक्ति फिर्ता लिएर नेपाली जनतासँग माफी माग्न माग गरिएको छ। ज्ञापनपत्रमा राष्ट्रिय स्वाभिमानसँग जोडिएको विषयमा सरकार स्पष्ट हुनुपर्ने कांग्रेसको धारणा उल्लेख गरिएको छ।
त्यसैगरी, सरकारले आर्थिक वर्ष २०८३/८४ को बजेटमार्फत शिक्षा र स्वास्थ्य क्षेत्रमा लगाएको कर तत्काल फिर्ता लिन, सामुदायिक विद्यालय र सरकारी अस्पतालको स्तरोन्नति गरी गुणस्तरीय शिक्षा तथा सर्वसुलभ स्वास्थ्य सेवाको सुनिश्चितता गर्न पनि माग गरिएको छ। ज्ञापनपत्रमा विद्युत् सेवामा लगाइएको मूल्य अभिवृद्धि कर (भ्याट) तत्काल हटाउन, विद्युत् उपभोगलाई प्रोत्साहन गर्ने नीति अवलम्बन गर्न तथा पेट्रोलियम पदार्थको प्रयोग घटाउने वातावरण निर्माण गर्नुपर्ने उल्लेख गरिएको छ ।
त्यस्तै, भूमि ऐन २०२१ र वन ऐन २०७६ का अव्यावहारिक कानुनी व्यवस्थाका कारण सुकुम्बासी समस्या समाधान हुन नसकेको भन्दै उचित बसोबासको व्यवस्था नगरी प्रहरी प्रशासन परिचालन गरेर घरटहरा हटाउने कार्य तत्काल रोक्न सरकारसँग माग गरिएको छ । नेपाली कांग्रेस मकवानपुरले सरकार जनभावनाप्रति संवेदनशील भई ज्ञापनपत्रमा उठाइएका विषयमा शीघ्र सम्बोधन गर्न आग्रह गर्दै बेवास्ता गरिए लोकतान्त्रिक, रचनात्मक र शान्तिपूर्ण विरोधका कार्यक्रम अघि बढाउने चेतावनीसमेत दिएको छ।
कार्यक्रममा पार्टीका पूर्व सभापति रघुरमण न्यौपाने, सचिव इश्वर पाठक, सहसचिव इन्दिरा न्यौपाने, नगरसभापति उत्सव इटेनी, केन्द्रीय प्रतिनिधि बद्री अर्याल, प्रवक्ता अर्जुनप्रसाद चौलागाईं, जिल्ला तहका नेता कार्यकर्ताहरूको सहभागिता रहेको थियो ।