डा. गोविन्द केसी अनशन बस्ने

फाइल तस्विर

७ साउन, हेटौंडा । वरिष्ठ चिकित्सक तथा चिकित्सा शिक्षा सुधार अभियन्ता प्रा. डा. गोविन्द केसी अनशन बस्ने भएका छन् । अनशनका लागि उनी कैलालीको धनगढी पुगेका हुन् ।
उनी धनगढी उपमहानगरपालिका–१ मा रहेको श्रीकृष्ण मन्दिर धर्मशालामा आजदेखि अनशन बस्दैछन् । उनले पाँचबुँदे माग राखेका छन् ।
डा. केसीले सरकारले आफूले उठाएका मागप्रति संवेदनशीलता नदेखाएको तथा साउन ५ गतेसम्म दिएको समयसीमासमेत बेवास्ता गरेपछि पुनः सत्याग्रहमा बस्न बाध्य भएको बताएका छन् । उनले आन्दोलनबाट उत्पन्न हुने कुनै पनि परिस्थितिको जिम्मेवारी वर्तमान सरकारले लिनुपर्ने चेतावनी दिएका छन् ।
उनले जारी गरेको विज्ञप्तिमा चिकित्सा शिक्षा र स्वास्थ्य सेवा पूर्ण रूपमा गैरनाफामूलक सार्वजनिक सेवा हुनुपर्ने उल्लेख गर्दै ‘राष्ट्रिय चिकित्सा शिक्षा ऐन, २०७५’ को प्रभावकारी कार्यान्वयन गर्न सरकारसँग माग गरिएको छ । साथै मापदण्डविपरीत निजी मेडिकल कलेजमा सशुल्क सिट वृद्धि, छात्रवृत्ति कटौती तथा स्वार्थ बाझिने व्यक्तिलाई चिकित्सा शिक्षा आयोग र विश्वविद्यालयको नेतृत्वमा नियुक्त गर्ने प्रयासको विरोध गरिएको छ ।
डा. केसीले गेटास्थित शहीद दशरथ चन्द मेडिकल विश्वविद्यालयमा गरिएको नियुक्तिप्रति पनि आपत्ति जनाएका छन् । विश्वविद्यालयलाई राजनीतिक र व्यापारिक स्वार्थको केन्द्र बनाउन खोजिएको आरोप लगाउँदै विवादित नियुक्ति तत्काल बदर गर्नुपर्ने लगायत उनको माग छ ।