बागमती सरकारमा हानेपाको 'इन्ट्रि', भौतिक मन्त्री पौडेलको राजिनामा

१९ साउन, हेटौंडा । बागमती प्रदेश सरकारमा हाम्रो नेपाली पार्टी (हानेपा) को 'इन्ट्रि' भएको छ । बागमती प्रदेशमा नेकपा एमालेले कांग्रेस नेतृत्वको सरकारबाट समर्थन फिर्ता लिएपछि देखिएकाे अन्यौलताबीच प्रदेश सरकारमा हानेपाको 'इन्ट्रि' भएको हो ।
मुख्यमन्त्री इन्द्रबहादुर बानियाँले सरकारलाई समर्थन गर्न बागमती प्रदेशसभामा रहेका दलहरूलाई आफु नेतृत्वको सरकारलाई समर्थन गर्न पत्राचार गरेको भोलिपल्ट हानेपाले सरकारलाई समर्थन गर्दै सरकारमा  सहभागी भएको हो ।
मुख्यमन्त्री बानियाँले आज मन्त्रिपरिषद्को पुर्नगठन तथा कार्यविभाजन गर्दै हाम्रो नेपाली पार्टीका प्रदेशसभा सदस्य शैलेन्द्र मान बज्राचार्यलाई भौतिक पूर्वाधार विकास मन्त्रालयका मन्त्री नियुक्त गरेका छन् ।
यसअघि भौतिक पूर्वाधार विकास मन्त्री बिनु रायमाझी पौडेलले आजै मन्त्री पदबाट राजिनामा दिएकी छिन । 
मुख्यमन्त्रीको सिफारिसमा बागमती प्रदेशका प्रदेश प्रमुख दीपकप्रसाद देवकोटाले नयाँ कार्यविभाजन गरेका छन् । नयाँ कार्यविभाजनमा शिवराज अधिकारीलाई आन्तरिक मामिला, कानुन तथा सहकारी मन्त्रालय, उर्मिला नेपाल कृषि, पशुपन्छी, वन तथा वातावरण मन्त्रालय, कञ्चन चन्द्र बादेलाई स्वास्थ्य तथा सामाजिक विकास मन्त्रालयको जिम्मेवारी दिइएको छ।
त्यसैगरी प्रभात तामाङलाई आर्थिक मामिला तथा योजना मन्त्रालय, सुरेश श्रेष्ठ उद्योग, पर्यटन, श्रम तथा यातायात मन्त्रालय, कृष्णकुमार तामाङलाई खानेपानी, ऊर्जा तथा सिँचाइ मन्त्रालय र शैलेन्द्र मान बज्राचार्यलाई भौतिक पूर्वाधार विकास मन्त्रालयको जिम्मेवारी प्रदान गरिएको छ।
मुख्यमन्त्री बानियाँले मन्त्रिपरिषद्को कार्यसम्पादनलाई थप प्रभावकारी, समन्वयात्मक र परिणाममुखी बनाउन मन्त्रालयहरूको पुर्नगठन तथा कार्यविभाजन गरिएको जनाएका छन् ।