कांग्रेसद्वारा बागमती प्रदेशसभाको बैठक स्थगित गर्न माग

८ भदौ, हेटौंडा । बागमती प्रदेशका नवनियुक्त मुख्यमन्त्री किरण थापा मगरले प्रदेशसभाबाट विश्वासको मत लिन बोलाईएको प्रदेशसभा बैठक स्थिगत गर्न माग गरिएको छ । बैठक स्थगित गर्न माग गर्दै नेपाली कांग्रेस बागमती प्रदेश संसदीय दलले प्रदेशसभाका सभामुखसमक्ष लिखित निवेदन दर्ता गराएको छ।
कांग्रेस संसदीय दलका प्रमुख सचेतक पुकार महर्जनद्वारा हस्ताक्षरित पत्रमा राष्ट्रिय प्रजातन्त्र पार्टी संसदीय दलकी प्रमुख सचेतक कुमारी तामाङलगायतले न्याय निरूपणका लागि उच्च अदालत पाटन हेटौंडा इजलासमा रिट निवेदन दिएकोमा न्यायाधीश बबिता उप्रेतीको इजलासले छलफलका लागि भदौ १० गते पेशी तोकेको र मुद्दा हाल अदालतमा विचाराधीन रहेको कांग्रेसको दाबी छ।
पत्रमा नेपालको संविधानको धारा १९१ उद्धृत गर्दै विचाराधीन मुद्दासँग सम्बन्धित विषयमा प्रदेशसभामा छलफल गर्न संवैधानिक बन्देज छ । सोही आधारमा सरकारले विश्वासको मत लिने विषयमा आजको बैठकमा छलफल गर्नु असंवैधानिक हुने भन्दै अदालतको अन्तिम निर्णय नआएसम्म बैठक स्थगित गरिनुपर्ने माग कांग्रेसले राखेको छ।
मुख्यमन्त्री थापा मगर एमाले, नेकपा र राप्रपाका केही सांसदको समर्थनमा बागमतीको मुख्यमन्त्रीमा नियुक्त भएका थिए। तर सत्ता समीकरणमा सामेल राप्रपाभित्रै समर्थनलाई लिएर विवाद चर्किएको छ, जसका कारण थापा मगरको विश्वासको मत परीक्षण थप पेचिलो बनेको छ।