तेस्रो मतसहित बानियाँ केन्द्रीय सदस्यमा निर्वाचित

३० असोज, हेटौंडा । नेपाली कांग्रेस बागमती प्रदेशका सभापति एवम् पूर्वमुख्यमन्त्री इन्द्रबहादुर बानियाँ पार्टीको केन्द्रीय सदस्यमा निर्वाचित भएका छन् । कांग्रेसको १५औँ महाधिवेशनमा तेस्रो स्थान हासिल गर्दै उनी केन्द्रीय कार्यसमितिमा पुगेका हुन्।
उनले ४७३२ मत प्राप्त गरेका छन् । बानियाँ भन्दा अघि ललितपुरका मेयर चिरीबाबु महर्जनले ५३३० मत र प्रतिनिधिसभा सदस्य निश्कल राईले ४९५६ मत ल्याएका छन् । खुलातर्फ ४५ जना केन्द्रीय सदस्य निर्वाचित हुने व्यवस्था छ।
कांग्रेस मकवानपुरको सभापति, बागमती प्रदेश सभापति, प्रदेशको मुख्यमन्त्रीको जिम्मेवारी सम्हालिसकेका बानियाँले महाधिवेशनको मतलाई पार्टी एकताबद्ध बनाउने जिम्मेवारीका रूपमा लिएको बताए । निर्वाचित भएपछि उनले कांग्रेसलाई थप बलियो राष्ट्रिय शक्तिका रूपमा स्थापित गर्न सक्रिय रहने प्रतिबद्धता व्यक्त गरेका छन्।
राष्ट्रिय राजनीतिमा कांग्रेसको भूमिका निर्णायक बनाउन पार्टी रूपान्तरणमा क्रियाशील रहने उनको भनाइ छ। उनले कांग्रेसलाई न्यायमुखी, आयमुखी, गरिबमुखी, विकासमुखी, गाउँमुखी र जनमुखी बनाउने प्रतिबद्धता पनि व्यक्त गरेका छन्।
हेटौँडा–१८ हर्नामाडीका बानियाँ २०४४ सालदेखि राजनीतिमा सक्रिय छन्। नेपाल विद्यार्थी सङ्घ र नेपाल तरुण दल हुँदै पार्टी राजनीतिमा अघि बढेका उनी महाधिवेशन प्रतिनिधि तथा महासमिति सदस्यपछि २०७३ सालमा कांग्रेस मकवानपुरको सभापति बनेका थिए।
२०७८ मङ्सिरमा भएको कांग्रेसको पहिलो बागमती प्रदेश अधिवेशनबाट उनी प्रदेश सभापतिमा निर्वाचित भए। यसअघि उनी २०७० सालको दोस्रो संविधानसभा निर्वाचनमा मकवानपुर–१ बाट निर्वाचित भएका थिए। त्यसपछि उनले संस्कृति, पर्यटन तथा नागरिक उड्डयन राज्यमन्त्री र गृह राज्यमन्त्रीको जिम्मेवारी सम्हाले।
२०७४ र २०७९ को निर्वाचनमा उनी मकवानपुर–२ ‘ख’ बाट प्रदेशसभा सदस्य निर्वाचित भए । २०७४ मा कांग्रेसको प्रदेश संसदीय दलको नेता बनेका बानियाँ २०८२ साउन २० गते बागमती प्रदेशको छैटौँ मुख्यमन्त्री नियुक्त भएका थिए ।

बानियाँ नेतृत्वको सरकारले प्रशासनिक खर्च घटाउने उद्देश्यले बागमतीमा मन्त्रालय सङ्ख्या १४ बाट आठमा झार्ने निर्णय गरेको थियो। आर्थिक वर्ष २०८३८४ को सुरुवातसँगै निर्णय कार्यान्वयनमा ल्याइएको थियो ।
उनको नेतृत्वको सरकारले विपन्न परिवारका विद्यार्थीलाई चिकित्सा र इन्जिनियरिङलगायत प्राविधिक उच्च शिक्षामा पहुँच पुर्‍याउने कार्यक्रम अघि बढाएको थियो । आर्थिक अवस्थाका कारण प्राविधिक शिक्षा अध्ययन गर्न नसक्ने विद्यार्थीको अभिभावक प्रदेश सरकार बन्ने उद्देश्यले कार्यक्रम अघि बढाइएको उनको भनाइ थियो।
केन्द्रीय सदस्यमा निर्वाचित भएपछि बानियाँले सरकारको नेतृत्व गर्दा अघि सारेका गरिबमुखी, आयमुखी र न्यायमुखी प्राथमिकतालाई पार्टी रूपान्तरणको प्रतिबद्धतासँग जोडेका छन्। महाधिवेशन प्रतिनिधिको विश्वासलाई कायम राख्दै कांग्रेसलाई जनताका आवश्यकता र अपेक्षासँग जोड्न क्रियाशील रहने उनको सङ्कल्प छ। (रातोपाटीबाट)