घुस लिने २ जना हेटौँडामा पक्राउ

४ असोज, हेटौंडा । विद्युत मिटर जडानका लागि घुस लिने २ जना कर्मचारी मंगलबार नेपाल विद्युत प्राधिकरण हेटौंडाबाट पक्राउ परेका छन् । अख्तियार दुरुपयोग अनुसन्धान आयोग क्षेत्रीय कार्यालय हेटौँडाले उनीहरुलाई पक्राउ गरेको हो ।

पक्राउ पर्नेमा प्राधिकरण हेटौँडा शाखाका कार्यालय सहायक धनबहादुर विक र पूर्व कर्मचारी विष्णु चौलागाई रहेका छन् । चौलागाई प्राधिकरणको इलेक्ट्रिसियन पदबाट ६ महिना अघि अवकास प्राप्त कर्मचारी हुन् । उनीहरु दुबैलाई प्राधिकरणको कम्पाण्ड बाहिर पक्राउ गरेको अख्तियार क्षेत्रीय कार्यालय हेटौँडाका प्रवक्ता नरेन्द्र भट्टराईले बताए । घुस कारोबारको सूचनाको आधारमा उनीहरुलाई पक्राउ गरी अनुसन्धान थालिएको उनले बताए ।

हेटौंडा चिसापानीमा कपास बनाउने उद्योगमा मिटर जडानका लागि घुस मागेपछि अख्तियार क्षेत्रीय कार्यालय हेटौंडासंग समन्वय गरेको जनाईएको छ । कर्मचारीले उद्योगी सुवास दाहाल र राजु दुलाललाई ३२ हजार रूपैयाँ दिए दुई दिनमै मिटर जडान गरिदिने बताएका थिए । घुस मागेको जानकारी उद्योगीहरुले दिएपछि पक्राउ गर्न आफुहरुले समन्वय गरेको विप्लव माओवादी मकवानपुरका नेता गोकुल दाहालले बताए । तस्विर सौ. – गोकुल दाहाल