लामिटार कप फुटबलको  फाइनलमा आयोजक  

आज भएको खेलमा म्यान अफ द म्याच प्रदान गरिदै

२७ असोज, हेटौँडा ।  मनहरी गाउपालिका ३  हाडीखोलामा सन्चालन भैरहेको प्रथम लामिटार कप फुटबल प्रतियोगितामा आयोजक लामिटार यूथ क्लवको ए टिम फाइनल प्रवेश गरेको छ । 
 शनिबार भएको पहिलो सेमिफाइनल भिडन्तमा मसिनेको जनजागरण क्लवलाई एकका विरुद्ध सुन्य  गोल अन्तरले हराउँदै आयोजक टिम  फाइनल प्रवेश गरेको हो । 
लामिटारलाई जित दिलाउन नवौं मिनेटमा अबिनास राईले गरेको गोल नै निर्णायक बन्यो । क्याप्टेन सुमन राईको पासलाई सदुपयोग गर्दै उनले बललाई पोष्टको दिशा दिएका हुन् । यता  मसिनेले  भने केही राम्रो मौका गुमाउदा पराजित हुन पुगेको हो  । खेलको म्यान अफ द म्याच मसिनेका मनिष लामा घोषित भए । लामालाई खेलकुद समन्वय समिति हेटौंडा १९ का अध्यक्ष राजु घलेले उपलब्ध गराएको म्यान अफ द म्याचको ट्रफी प्रतियोगिताका सहयोगी  हाडीखोलाका युवा व्यवसायी  विकाश गौतमले प्रदान गरेका थिए  । जारी प्रतियोगितामा फाइनल प्रवेशको लागि आइतबार सयपत्री युवा क्लव र शक्ति क्लव मनहरी भिड्नेछन् । फाइनल खेल ३० गते फुलपातिको दिन हुनेछ ।  
प्रतियोगितामा मनहरी गाउँपालिकाको २१ वटा क्लवको सहभागिता रहेको थियो ।  प्रतियोगिताको बिजेताले नगद ५० हजार र उपबिजेताले नगद २५ हजारसहित ट्रफी, मेडल र प्रमाणपत्र प्राप्त गर्नेछ । यस्तै बिधागत उत्कृष्ट खेलाडीलाई समेत नगदको व्यवस्था गरिएको आयोजक लामिटार यूथ क्लवले जनाएको छ ।