एएफसी यू–१९ महिला च्याम्पियनसिपः नेपालको पहिलो खेल थाइल्याण्डसँग

३० असोज, हेटौँडा । आगामी कात्तिक पहिलो साता थाइल्याण्डमा सुरू हुने एएफसी यू–१९ महिला च्याम्पियनसिप छनोटको पहिलो खेलमा नेपालले बलियो प्रतिद्वन्द्वी घरेलु टोली थाइल्याण्डसँग प्रतिस्पर्धा गर्ने भएको छ  ।
छनोटको समूह ‘बि’ मा रहेको नेपालले थाइल्याण्डपछि भारत र पाकिस्तानसँग खेल्नेछ ।
नेपाल र थाइल्याण्डबीचको खेल कात्तिक ७ गते चोनबुरी रंगशालामा हुनेछ । यस्तै भारतसँग कात्तिक ९ र छनोटको अन्तिम खेल पाकिस्तानसँग कात्तिक ११ मा खेल्नेछ ।
समूह शीर्ष टोली छनोटको दोस्रो चरणको पुग्नेछ । यस्तै पहिलो चरणको छनोटको उत्कृष्ट दुई उपविजेताले पनि दोस्रो चरणमा स्थान बनाउनेछन् । छनोटको पहिलो चरणमा ६ समूहबाट २५ राष्ट्रले प्रतिस्पर्धा गर्नेछन् ।
आगामी अप्रिलमा हुने दोस्रो चरणको छनोटमा ८ टोलीले प्रतिस्पर्धा गर्नेछन् । जसबाट ४ टोलीले आगामी वर्ष थाइल्याण्डमा हुने एएफसी यू–१९ महिला च्याम्पियनसिप खेल्नेछन् ।
च्याम्पियनसिपका लागि चीन, जापान र उत्तर कोरिया छनोट भईसकेका छन् । छनोट खेल्ने नेपाली टोली कात्तिक ५ गते थाइल्याण्ड प्रस्थान गर्ने छ । 
नेपालले गत साता भुटानमा भएको साफ यू–१८ महिला च्याम्पियनसिपको फाइनल खेलेको थियो । जस्मा नेपाल बंगलादेशसँग १–० ले पराजित हुँदै उपविजेताम सिमित भएको थियो ।
फोटोः गुगल