ओलम्पिक छनोटः नेपाल म्यानमारसँग १–१ मा रोकियो 

२५ कार्तिक, हेटौँडा । सन् २०२० को टोकियो ओलम्पिक खेलकुदका लागि एसियाली समूहको महिला फुटबल छनोटमा नेपालले लगातार दोस्रो बराबरी खेलेको छ ।
आइतबार आयोजक म्यानमारसँग भएको दोश्रो खेलमा नेपालले १–१ कै बराबरी खेलेको हो । यसअघि पहिलो खेलमा भारतसित पनि नेपालले १–१ गोलको बराबरी खेलेको थियो ।
नेपालले खेल सुरु भएको दोश्रो मिनेटमै पाएको पेनाल्टीमा गरेको गोलबाट अग्रता लिएको थियो । सावित्रा भण्डारीलाई म्यानमारकी खेलाडीले ‘डी बक्स’भित्र लडाएपछि पाएको पेनाल्टीलाई साबित्राले दोस्रो मिनेटमै गोलमा परिणत गरेकी थिइन् ।
नेपालले अग्रतालाई धेरैबेर टिकाउन भने सकेन । १४औं मिनेटमै म्यानमारले कर्नर प्रहारबाट बराबरी गोल गरेको थियो ।
त्यसपछि भने दुवैतर्फबाट गोल हुन नसक्दा दुवै टिमले १–१ अंक बाँडे । यो बराबरीसँगै नेपालले दोस्रो चरणमा पुग्ने सम्भावना भने कायम राखेको छ ।
यस समूहमा रहेका भारत र म्यानमारको समान ४/४ अंक रहेको छ । नेपालको भने २ अंक भएको छ । म्यानमारले पहिलो खेलमा बंगलादेशलाई ५–० ले पराजित गरेको थियो । भारतले आइतबारै आफ्नो दोस्रो खेलमा बंगलादेशलाई ७–१ ले हराएको छ ।
अन्तिम खेलमा म्यानमार र भारतले बराबरी खेल्दा नेपालले बंगलादेशमाथि फराकिलो अन्तरको जित निकाले नेपाल अघिल्लो चरणमा प्रवेश गर्ने छ ।