नबोदय शिशु सदनमा खेलकुद प्रतियोगिता सम्पन्न

२८ मंसिर, हेटौँडा । हेटौँडा–४ मा रहेको नवोदय शिशु सदन अंग्रेजी माध्यमिक विद्यालयको सप्ताहव्यापी खेलकुद प्रतियोगिता शुक्रबार सम्पन्न भएको छ । हेटौँडाको क्याम्पा चौरमा भएको डोरी तान्ने खेलमा छात्रातर्फको फाइनल खेलमा कञ्चनजङघा सदनलाई पराजित गर्दै सगरमाथा सदन विजयी बन्न सफल भयो । 

यसैगरी छात्रतर्फ अन्नपूर्ण सदन प्रथम हुदाँ धौलागिरी सदन द्वितीय स्थान हुन सफल भयो । शुक्रबार भएको स्लो साइकल रेस प्रतियोगितामा कञ्चनजङ्घा सदनका अजय बस्नेत प्रथम, धौलागिरीका सुभम खड्का द्वितीय र प्रशान्त ठाकुर तृतीय भएका थिए । मंसिर २२ गतेबाट शुरु भएको प्रतियोगितामा जुनियर र सिनियर कक्षा छुट्याएर अन्तर सदनात्मक प्रतियोगिता भएको थियो । प्रतियोगिता अन्तर्गत टेबुलटेनिस, भलिबल, ब्याटमिन्टन, लुडो, चेस विद्यालयमै भएको थियो भने क्रिकेट हुप्राचौरमा र फुटबल, बोरादौड, स्लो बाइक रेस, स्पोन रेस, दौडलगायतको प्रतियोगिता क्याम्पा चौरमा भएको थियो ।

प्रतियोगितामा मदन भण्डारी स्पोर्टस् एकेडेमी शिक्षक संघ मकवानपुरका अध्यक्ष राजाराम पोखरेल र विनोद श्रेष्ठले रेफ्रीको भूमिका निर्वाह गरेका थिए । प्रतियोगितामा विजयी भएका विद्यार्थीहरुलाई विद्यालयले एक कार्यक्रमकाबीच पुरस्कार प्रदान गरिने विद्यालयका प्रशासन प्रमुख सुरज बस्नेतले जानकारी दिए ।