चार जना पत्रकार प्रेस युनियन मकवानपुरमा आवद्ध

१० पुस, हेटौंडा । नेपाली कांग्रेसको शुभेच्छुक संस्था नेपाल प्रेस युनियन मकवानपुरमा चार जना सञ्चारकर्मीले औपचारिक रुपमा प्रवेश गरेका छन् । मंगलबार भीमफेदी गाउँपालिकाकाको सानुटारमा भएको वनभोज कार्यक्रमका अवसरमा शक्ति एफएमका स्टेशन म्यानेजर तथा तु–खबर डटकमका समाचार प्रमुख बलराम पुडासैनी, तुखबर डटकम तथा शक्ति एफएममा आबद्ध सन्देश थिङ, हेटौंडा सन्देशमा आवद्ध भुवन घलान र टिम टेलिभिजनमा आवद्ध सविना तिल्सिनाले प्रेस युनियनमा औपचारिक रुपमा प्रवेश गरेका हुन् ।
नेपाली कांग्रेस ३ नम्बर प्रदेशको संसदीय दलका नेता इन्द्रबहादुर बानियाँ, प्रदेशसभा सदस्य रिना गुरुङ, प्रेस युनियन मकवानपुरका अध्यक्ष कुमार अधिकारी, निवर्तमान अध्यक्ष रुपेश दुलाल, पार्टी जिल्ला कोषाध्यक्ष गोपीलाल विक, हेटौंडा उपमहानगर सभापति आनन्दराम पराजुलीलगायले नवप्रवेशीलाई स्वागत गरेका थिए । 
वनभोज कार्यक्रमकै अवसरमा युनियनले चार वटा विभागको संयोजक समेत तोकेको छ । युनियनको प्रशिक्षण विभागमा उपाध्यक्ष मणिराज गौतमलाई संयोजक तोकिएको छ । त्यसैगरी कार्यक्रम विभागमा श्रीराम दाहाल, संगठन विभागमा बलराम पुडासैनी र आर्थिक विभागको संयोजकमा कोषाध्यक्ष विजय पौडेललाई चयन गरिएको छ । कार्यसमिति बैठकले बलराम पुडासैनी र श्रीराम दाहाललाई कार्यसमिति सदस्यमा मनोनितसमेत गरिएको छ । 
कार्यक्रममा बोल्दै कार्यक्रमका प्रमुख अतिथि कांग्रेस प्रदेश नम्बर ३ संसदीय दलका नेता तथा मकवानपुर सभापति इन्द्रबहादुर बानियाँले लोकतन्त्रलाई दरिलो बनाइ राख्न पत्रकार जगतको महत्वपूर्ण भूमिका हुने भएकाले सदैव आफ्नो पेशाप्रति इमान्दार रहिरहन सबैलाई आग्रह गरे । वर्तमान सरकारले जनताको हितमा काम नगरेको भन्दै यसबारे समेत खबरदारी गर्न पत्रकारहरुलाई आग्रह थियो ।