एट ए साईड फुटबलको उपाधी प्रगतिशीललाई

१३ कार्तिक, हेटौंडा । हेटौंडा-६ चौघडामा भएको एट ए साईड फुटबल प्रतियोगिताको उपाधी चुच्चेखोलाको प्रगतिशील युवा क्लवले कव्जा गरेको छ । गतबर्षको हारको बदला लिंदै प्रगतिशीलले शनिवार उपाधी कब्जा गरेको हो ।

बंशगोपाल उच्च माविको मैदानमा भएको अन्तिम प्रतिष्पर्धामा चिर परिचित प्रतिष्पर्धी पुतलीबजारको बंशगोपाल युवा क्लबलाई पेनाल्टीमा २-१ गोल अन्तरले पराजित गर्दै प्रगतिशीलले उपाधी उचालेको छ । निर्धारित समयमा दुबै टिमबाट १/१ गोल भएपछि खेल अतिरिक्त समयमा धकेलिएको थियो । अतिरिक्त समयमा दुबै टिम गोलरहित बराबरीमा रोकिएपछि पेनाल्टीबाट निर्णय लिनुपरेको थियो ।

पेनाल्टीमा पुतलीबजारका निशान घिमिरेले एक गोल गरेका थिए भने प्रगतिशीलका तर्फबाट विवेश माझी र सुजन अाचार्यले गोल गरेका थिए । भिएफटी चौघडाको अायोजनामा भएको प्रतियोगितामा विजेताले २० हजार र उपविजेताले १० हजार रूपैयाँसहित मेडल र प्रमाणपत्र प्राप्त गरेका छन् ।कार्यक्रममा एन्फा अन्डर १४ मा प्रशिक्षणरत खेलाडी रोशन दोङलाई नगदसहित सम्मान गरिएको थियो ।

विजेता, उपविजेता र सहभागी टिमलाई जिल्ला खेलकुद विकास समितिका निवर्तमान अध्यक्ष बालकृष्ण चौलागाईं, बसामाडि जेसीजका अध्यक्ष सुनिल दाहाल, ६ नम्बर वडा टोल विकास समन्वय समिति संयोजक गणेश दुलाल, तरूण दल जिल्ला अध्यक्ष ईश्वर पाठक, नवजीवन ज्योति क्लबका अध्यक्ष श्रीराम पुडासैनी, बाल जागृति युवा बर्ष माविका प्रअ अर्जुनप्रसाद चौलागाईं, नेपाल स्वास्थ्यकर्मी समाजका नीजि विभागका केन्द्रीय संयोजक उत्सव चौलागाईं, कार्यक्रम संयोजक राजकुमार बास्तोला लगायतले पुरस्कार वितरण गरेका थिए ।

प्रतियोगितामा हेटौंडा-६ का ८ वटा टोलीको सहभागिता रहेको थियो ।