असन्तुष्टलाई समेट्न एमाले लचक हुनुपर्छ : पौडेल

२ मंसिर, हेटौँडा । नेपाली काँग्रेसका बरिष्ठ नेता रामचन्द्र पौडेलले असन्तुष्ट पक्षका मागबारे लचिलो भएर अघि बढ्न नेकपा एमालेलाई आग्रह गरेका छन् ।
नेपाली काँग्रेस मकवानपुरले विहिबार हेटौडामा गरेको कार्यकर्ता भेटघाट कार्यक्रममा बोल्दै नेता पौडेलले संविधान कार्यान्वयनका लागि पनि असन्तुष्ट पक्षमा माग सम्बोधन गर्नुपर्ने बताए । संविधान जारी गर्ने प्रमुख तीन दलले कार्यान्वयनका लागि वातावरण बनाउनुपर्नेमा जोड दिंदै उनले समस्या समाधानका लागि एमाले लचक भएर अघि बढ्नुपर्ने बताए ।
नयाँ संविधानले दिएका संघियता, गणतन्त्र, धर्म निरपेक्षता जस्ता विषयलाई संस्थागत गर्नुपर्ने अवस्थामा राजनैतिक दलले आफ्नो अडान मात्रै राखेर बस्न नहुनेमा उनको जोड थियो । ‘प्राप्त उपलव्धीलाई संस्थागत गर्ने बेलामा आँठो, किलो मात्रै समाएर हुन्छ, सबै लचक हुनुपर्यो ।’–उनले भने । उनले संविधानले तोकेको समयमा ३ तहको निर्वाचन गर्नुपर्ने भएकाले यसका लागि असन्तुष्ट पक्ष र संविधान जारी गर्ने दलहरु एक ठाउँमा उभिनुपर्ने बताए ।
मधेश, लोकतन्त्र र काँग्रेस एक अर्काका पुरक भएकाले मधेशका असन्तुष्टीलाई काँग्रेसले गम्भिरतापूर्वक समाधानमा लागेको बताए । मधेशमा संविधानका बारेमा रहेका गलत धारणाको अन्त्यका लागि आफु मधेश दौडाहामा निस्किएको नेता पौडेलको भनाई थियो । कार्यक्रममा पूर्व केन्द्रिय सदस्य शोभाकर पराजुलीले गौतम बुद्धपछि नेपालमा विपि कोइरालालाई सम्झने गरेको भन्दै उनको सिद्धान्तमा अघि बढ्न कार्याकर्तालाई सुझाव दिए ।
नेपाली काँग्रेस मकवानपुरका सभापति इन्द्रबहादुर बानियाँको अध्यक्षतामा भएको कार्यक्रममा मकवानपुरका जिल्ला नेता, चितवनसहित विभिन्न जिल्लाका नेता, मकवानपुरका विभिन्न क्षेत्रका नेता कार्यकर्ताको सहभागिता रहेको थियो ।