महोत्सवमा कलाकारलाई दर्शकको साथ

३ मंसिर, हेटौंडा । सुमन भोम्जन स्मृति खेलकुद प्रतिष्ठानले औद्योगिक शान्ति नेपाल संस्था संगको सहकार्यमा बिहीबारबाट हेटौंडा आँखा पछाडीको खाली जग्गा (भूटनदेवी पार्क) मा सञ्चालन गरेको राष्ट्रिय खेलकुद तथा व्यापार महोत्सव २०७३ जारी रहेको छ ।

नेको इन्स्योरेन्स पावर्ड बाईको रुपमा रहेको महोत्सवको दोस्रो दिन मकवानपुरका विभिन्न गाउँ गाउँबाट मानिसहरु महोत्सव अवलोकनका लागि आएको आयोजकले जानकारी दिएको छ । राउटेको स्टलमा मानिसहरुको भीड लागेको छ । यस्तै अन्य स्टलमा समेत मानिसहरुको उल्लेख्य सहभागिता रहेको पाइएको छ ।

‘महोत्सवको दोस्रो दिन उल्लेख्य मात्रामा दर्शकको उपस्थिती पाएका र्छौं’, आयोजक सुमन भोम्जन स्मृति प्रतिष्ठानका अध्यक्ष भेष खड्कीले भने, ‘भोलीका दिनहरुमा अझै दर्शकको भीड बढ्ने सहजै अनुमान लगाउन सकिन्छ ।’ प्रतिष्ठानको आयोजनामा पहिलो पटक महोत्सव भएको स्मरण गराउँदै उनले सबैको सल्लाह एवम् सुझाव अनुसार यो महोत्सवलाई १३ दिनसम्म सञ्चालन गरिने जानकारी दिए । 
हसाए दमनले, नचाए बद्रीले
महोत्सवको दोस्रो दिन शुक्रबार हाँस्य कलाकार दमन रुपाखेती र सुजित थापाले हाँस्य प्रश्तुती पस्केका छन् ।

महोत्सव स्थलमा उपस्थित दर्शकहरु उनीहरुको प्रश्तुतीबाट मनोरञ्जन लिइरहृेका देखिन्थे । उनीहरुले विभिन्न नेताको क्यारिकेचर एवम् सामाजिक विकृतिको बिषयमा चोटिलो प्रहार गरेका थिए ।

झमक्कै साँझ परेपछि स्टेजमा उत्रिएका लोक गायक बद्री पंगेनीको प्रस्तुती अन्तिमसम्म नाचेर अवलोकनकर्ताले साथ दिइरहेका थिए । रातो पछ्यौरी बोलको गीतबाट आफ्नो प्रश्तुती सुरु गरेका पंगेनीले खान्न म त पिँडालु कोक्यायो, नाचौला झ्याउरेको तालैमा लगायत करिब आधा दर्जन गीत गाएका थिए ।

महोत्सवमा गायिका प्रिया भण्डारी लगायतले आफ्नो प्रश्तुती महोत्सवमा पस्केका थिए । जारी महोत्सवमा शनिबार गायक सविन राई, लोकगायक भोजराज काफ्ले र हाँस्यकलाकार सविन काफ्लेको प्रस्तुती रहने महोत्सव प्रचारप्रसार समिति संयोजक गणेशदर्पण अधिकारीले जानकारी दिए ।