राष्ट्रिय फुल कन्ट्याक्ट कराँते सुरु

१० जेष्ठ, हेटौँडा । राष्ट्रिय फुल कन्ट्याक्ट कराँते प्रतियोगिता शुक्रबारबाट हेटौँडामा शुरु भएको छ । 
मकवानपुर क्योकुशिन कराँते संघको आयोजनामा हेटौंडाको हुप्रचौरमा भएको प्रतियोगितामा शुक्रबार ६० केजि भन्दा कमका पुरुष तथा ५५ केजि माथिका महिला प्रतियोगिहरुले प्रतिस्पर्धा गरेका छन् । 
६० केजि भन्दा कम तौल समूहमा मकवानपुरका विनोद थापा, स्याङ्जाका विक्की गुप्ता, काठमाण्डौँका तेन्जीङ केप्चे कार्की, रुपन्देहिका थमप्रसाद खड्का, ललितपुरका सरोज तामाङ, काठमाण्डौँका राजेन्द्र तामाङ, दावा लो, सन्तोषकुमार लामा, राजेश लामा, उत्तमलाल वाईवा, रुपन्देहीका सुरेन्द्र सुनार, पर्साका प्रिन्सकुमार यादव, कास्कीका राजेन्द्र थापामगर, काभ्रेका सुरज तामाङ र ललितपुरका महेशकुमार भुजेल विजयी भएका छन् । 
यस्तै ५५ केजि माथि महिला तर्फ नवलपुरकी विमला रुम्बा, झलकुमारी महत्तो ललितपुरकी सुनिता राई, स्याङजाकी सपना मगर, रोषनी गोतामे, मकवानपुरकी रविना लामा, निर्मला लो, काठमाण्डौकी निशा बोहरा विजयी भएका छन् । 
प्रतियोगिता अन्र्तगत पुरुष तर्फ ६० किलो माथि समुहको पहिलो चरणको प्रतियोगिता शनिबार हुने आयोजकले जनाएको छ । प्रतियोगितामा देशभरका २० जिल्लाका १८९ जना खेलाडीको सहभागिता हुने आयोजकले जनाएको छ ।
प्रतियोगितामा प्रथम हुनेले नगद २५ हजार सहित शिल्ड, मेडल तथा प्रमाणपत्र र दोश्रो तथा तेश्रो हुनेले क्रमश १५ तथा १० हजार सहित शिल्ड, मेडल तथा प्रमाणपत्र प्राप्त गर्ने आयोजकले जनाएको छ । 
त्यसैगरी बेष्ट फाईटरले नगद ५ हजार सहित शिल्ड, मेडल तथा प्रमाणपत्र प्राप्त गर्नेछन् । प्रतियोगितामा १० लाख रुपैँया खर्च हुने आयोजक समिति संयोजक शिवनारायण श्रेष्ठले जानकारी दिनुभयो । 
प्रतिनिधिसभा सांसद तथा अर्थ समिति सभापति कृष्णप्रसाद दाहालको प्रमुख आतिथ्यतामा भएको उद्घाटन कार्यक्रम संघका अध्यक्ष कमल बरालको अध्यक्षतामा भएको हो ।