नीजिमा १० प्रतिशत स्वास्थ्य सेवा निःशुल्क

२७ मंसिर, काठमाण्डौं । देशभरका नीजि स्वास्थ्य संस्थामा पुस १ गतेबाट १० प्रतिशत स्वास्थ्य सेवा निःशुल्क हुने भएको छ । स्वास्थ्यमन्त्री गगन थापाले सोमबार स्वास्थ्य मन्त्रालयमा पत्रकार सम्मेलन गर्दै नीजि स्वास्थ्य संस्थामा पुस १ गतेबाट १० प्रतिशत सेवा निःशुल्क हुने जानकारी दिएका हुन् ।

उनका अनुसार बिपन्न, असहाय, एकल महिला, अपांगता भएका व्यक्ति र जेष्ठ नागरिकले देशभरका निजी अस्पताल तथा शिक्षण संस्था, गैह्र सरकारी तथा सामुदायीक अस्पताल र नर्सिङ होममा रहेका मध्ये १० प्रतिशत शैया निशुल्क हुने ब्यवस्था गरिएको बताएका हुन् । उनले निजी अस्पतालको छाता संगठन अफिनसंग भएको सम्झौता अनुसार निःशुल्क सेवा उपलव्ध गराउन लागेको बताए ।

निशुल्क सेवामा शल्यक्रिया र औषधी बाहेकका सेवा समेटिएको मन्त्री थापाले बताए । औषधी र शल्यक्रिया समेत निःशुल्क उपलव्ध गराउनेबारे अफिनसँग छलफल जारी रहेको समेत उनले जानकारी दिए । निःशुल्क सेवा लिनका लागी सरकारले तोकेका निकायबाट सिफारिस पत्र लैजानुपर्ने छ ।

यो सुविधाबाट केही हदसम्म स्वास्थ्य उपचारमा विपन्न वर्गको पहुँच बृद्धि हुनेमा आफु विश्वस्त रहेको मन्त्री थापाको भनाई थियो ।