हेटौंडामा अन्तर विद्यालय स्थलगत कविता लेखन प्रतियोगिता सम्पन्न

२१ असार, हेटौंडा। शनिबार हेटौंडामा भएको अन्तर विद्यालय स्थलगत कविता लेखन प्रतियोगितामा  जिएस निकेतनका यारिका कार्की सहित उत्कृष्ट ३ जना विद्यार्थीहरुलाई छानिएका छन्।

२०६ औँ भानु जयन्तीको अवसरमा नवोदय शिशु सदन अङ्ग्रेजी विद्यालयले आयोजना गरेको दोस्रो जिल्लाव्यापी अन्तर विद्यालय स्थलगत कविता लेखन प्रतियोगितामा जिएस निकेतनका यारिका कार्की, बालउज्ज्वल माविका सानुमाथा थिङ र भानु माविका सुशान्त दाहाल उत्कृष्ट भएका छन् । 

हेटौंडा उपमहानगरपालिकामा रहेका १८ वटा संस्थागत तथा सामूदायिक विद्यालयका विद्यार्थीहरुले प्रतियोगितामा सहभागिता जनाएको प्रतियोगितामा सहभागीहरुलाई ‘आमा’ शीर्षकमा कविता लेखन दिएको थियो । जसमध्ये उत्कृष्ट ३ जना विद्यार्थीहरुलाई छानिएको हुन  ।

विद्यालयका नेपाली विषय सुपरिवेक्षक तथा कार्यक्रम संयोजक सिएम रिमालको अध्यक्षतामा भएको कार्यक्रममा साहित्यकारद्वय गिरिजा अधिकारी र यश लामाले निर्णायकको भूमिका निर्वाह गरेका थिए । सफल भएका ३जनलाई नवोदय विद्यालयका शैक्षिक संयोजक अव्यक्त खनालले नगद ३ हजार रुपैयाँसहित पुरस्कार प्रदान गरेका थिए ।

त्यसैगरी छवी अनित्यको संयोजनमा सामुदायिक विद्यालयका तीन विद्यालयका विद्यार्थी र संस्थागत विद्यालयका तीन विद्यालयका विद्यार्थीबीच बालसाहित्य सम्बन्धी छलफल गरिएको थियो । जसमा नवोदय विद्यालयका राधाकुमारी महतो, मकवानपुर बाल विद्या सदनका स्मीति  गिरी, चन्द्रोदय माविका प्रतिमा पौडेल, जिएस निकेतनका निश्चल गौतम, आधुनिक राष्ट्रिय माविका राजकिरण शाह र बाल उज्जवल माविका आशिका जमरकट्टेल बीच छलफल भएको थियो ।  कार्यक्रममा झरना साहित्य परिवारका अध्यक्ष दीपक गौतम, आचल साहित्य कला पुञ्जका अध्यक्ष अप्सरा तिम्सीना, प्रगतिशील लेखक संगठन मकवानपुरका निवर्तमान अध्यक्ष पुरुषोत्तम आचार्यलगायतको आतिथ्यता रहेको थियो । विभिन्न विद्यालयका विद्यार्थीहरुले आफ्नो रचना समेत प्रस्तुत गरेका थिए ।