हेटौंडा अन्तर्राष्ट्रिय गोल्डकप फुटबल गोर्खा ब्रुअरीजले प्रायोजन गर्ने

५ पुस, हेटौंडा । सुमन भोम्जन स्मृति खेलकुद प्रतिष्ठानको आयोजनामा हुने दोस्रो हेटौंडा अन्तर्राष्ट्रिय आमन्त्रण गोल्डकप फुटबल प्रतियोगितामा गोर्खा ब्रुअरीजले प्रायोजन गर्ने भएको छ ।
पुस १४ गतेबाट २३ गतेसम्म सञ्चालन हुने दोस्रो हेटौंडा गोल्डकपका लागि आगामी तीनवर्षसम्म गोर्खा ब्रुअरीजले प्रायोजकको भूमिका निर्वाह गर्ने मंगलबार सम्झौता भएको छ । सम्झौता अनुसार गोर्खा ब्रअरीजको टुवोर्ग मुख्य प्रायोजक र रेडबुल सहप्रायोजक रहने भएको छ । सम्झौतामा प्रतिष्ठानका अध्यक्ष भेष खड्गी,  द्वितीय उपाध्यक्ष विशाल घोष तथा कम्पनीको तर्फबाट विक्री निर्देशक बैभब शर्मा, ब्रान्ड म्यानेजर सुवोध शर्माले हस्ताक्षर गरेका छन् ।
‘हामी अन्य व्यवसायिक संस्थाहरुसँग पनि सहप्रायोजनका लागि हस्ताक्षरको प्रक्रियामा रहेका छौं । पहिलो संस्करणभन्दा प्रतिस्पर्धात्मक र व्यवस्थितरुपमा प्रतियोगितालाई अगाडि बढाउने गरी तयारी गरिरहेका छौं’, प्रतिष्ठान अध्यक्ष खड्गीले भने ।
हेटौंडा–१० स्थित फरेष्ट्रीको खेल मैदानमा हुने प्रतियोगितामा नेपालका चर्चित छवटा ‘ए’ डिभिजन क्लबसहित तीन विदेशी क्लबले सहभागिता जनाउने बताइएको छ । प्रतियोगितामा साविकको विजेता मनाङ मस्र्याङदी, नेपाली आर्मी, नेपाल पुलिस, सशस्त्र प्रहरी, संकटा, सरस्वती, सहारा, घरेलु विजय युथ क्लबसहित भारत र भुटानी क्लबको सहभागिता रहने आयोजक प्रतिष्ठान अध्यक्ष खड्गीले जानकारी दिए ।
प्रतियोगिताको विजेता, उपविजेतालाई क्रमशः पाँचलाख र तीनलाख रुपियाँ नगदसहित ट्रफिको व्यवस्था गरिएको छ । विधागत रुपमा उत्कृट खेलाडी र हरेक खेलमा म्यान अफ दी म्याच पुरस्कारको व्यवस्था गरिएको छ । प्रतियोगिताका तयारी समेत तीब्ररुपमा भइरहेको बताइएको छ ।