रेडियो मकवानपुरलाई संस्थागत शिक्षा पत्रकारिता पुरस्कार

१४ पुस, हेटौँडा । संस्थागत शिक्षा पत्रकारिता पुरस्कार–२०७२ हेटौँडाको पहिलो सामुदायिक रेडियो, रेडियो मकवानपुर १०१.३ मेगाहर्ज सम्मानित हुने भएको छ ।
नेपाल पत्रकार महासंघ र शिक्षा विभागद्वारा गठित मूल्याङ्कन तथा छनोट समितिले शिक्षाक्षेत्रमा महत्वपूर्ण योगदान पुर्याएको भन्दै रेडियो मकवानपुरलाई पुरस्कार प्रदान गर्ने बिहीबार निर्णय सार्वजनिक गरेको हो । एफएम रेडियोलाई प्रदान गरिने उक्त पुरस्कार रेडियो मकवानपुर र रेडियो रसुवा (रसुवा) लाई संयुक्तरुपमा प्रदान गरिने भएको छ । पुरस्कारको राशी २० हजार रुपियाँ रहेको छ ।पुरस्कार यही पुस १९ गते काठमाडौमा एक कार्यक्रमको आयोजना गरी प्रदान गरिने कार्यक्रम रहेको छ । 

त्यस्तै उपत्यकासहित ६ क्षेत्रका एफएम रेडियोलाई प्रदान गरिने संस्थागत शिक्षा पत्रकारिता पुरस्कार पुर्वाञ्चलबाट पूर्वेली एफएम (मोरङ) र रेडियो मकालु (धनकुटा), उपत्यकाबाट रेडियो सगरमाथा (ललितपुर), पश्चिमाञ्चलबाट रेडियो सारथी (बाग्लुङ), मध्यपश्चिमाञ्चलबाट रुबरु एफएम (बाँके) र सुदूरपश्चिमाञ्चलबाट संयुक्तरुपमा रेडियो धनगढी (कैलाली) र रेडियो अमरगढी (डडेलधुरा) लाई प्रदान गरिएको छ ।
राष्ट्रिय शिक्षा पत्रकारिता पुरस्कार–२०७२’ यस पटक
दुई जना पत्रकारलाई संयुक्तरुपमा प्रदान गरिने भएको छ । ७५ हजार रुपियाँ राशीको यो पुरस्कार अन्नपूर्ण पोष्ट दैनिकका सूर्यप्रसाद पाण्डे र कान्तिपुर दैनिकका मकर श्रेष्ठलाई संयुक्त रुपमा प्रदान गर्ने निर्णय गरेको छ ।