नेपाल ओलम्पिक कमिटीको निर्वाचन रोकियो

१७ भदौ, हेटौंडा । नेपाल ओलम्पिक कमिटी (एनओसी) को भदौ २० गतेका लागी निर्धारण गरिएको निर्वाचन नगर्न सर्वोच्च अदालतले अन्तरिम आदेश जारी गरेको छ । निर्वाचनका लागि तय भएको मिति आउन तीन दिन बाँकी हुँदा मंगलबार सर्वोच्चले यस्तो आदेश गरेको हो ।
सर्वोच्च अदालतले २०६७ मा मान्यता दिएको नेपाल ओलम्पिक कमिटीका सदस्य कमलबहादुर चित्रकारले राष्ट्रिय मान्यता नपाएको एनओसीको निर्वाचन रोक्न माग गर्दै सर्वोच्चमा रिट दायर गरेपछि रिटमा सुनुवाई गर्दै सर्वोच्चका न्यायाधीश टंकबहादुर मोक्तानको इजलासले निर्वाचन रोक्न अन्तरिम आदेश जारी गरेको हो ।
चित्रकारले सरोकारवाला १२ जना व्यक्ति तथा संस्थालाई विपक्षी बनाउँदै आइतबार मुद्दा दायर गरेका थिए । 
न्यायाधिश मोक्तानको इजालासले दुवै पक्ष राखेर छलफल गरी उचित निश्कर्षमा पुग्नु जरुरी भएकाले भदौ २२ गतेको पेशी तोकेको छ । अदालतले सबै विपक्षीका नाममा एनओसी निर्वाचन नगराउन अन्तरिम आदेश जारी गरेको छ ।
भदौ २० गतेका लागि तय भएको निर्वाचनमा दुई पदाधिकारी कोषाध्यक्ष र उप महासचिव निर्विरोध भइसकेका छन् भने ५ उपाध्यक्षका लागि ८, १ महासचिवका लागि २, ३ सचिवका लागि ४ र ७ सदस्यका लागि ८ जनाले उम्मेदवारी दिएका छन् । एनओसीको नयाँ विधान अनुसार १९ सदस्यीय कार्यसमितिका लागि निर्वाचन हुनेछ ।