मुआब्जाको माग राख्दै हेटौडामा विरोध सभा

३ माघ, हेटौडा । सडक डिभिजन कार्यालय हेटौडाले पूर्वपश्चिम राजमार्ग अन्तर्गतको हेटौडा बजार सडक खण्डमा २५ मीटर भित्र पर्ने निजी सम्पत्तिको मुआब्जा नदिई सडक विस्तारका लागि जारी गरेको सूचनाको विरोधमा सोमबार हेटौडामा बिरोध सभा भएको छ ।
विरोध सभालाई सम्बोधन गर्दै मकवानपुर क्षेत्र नम्बर ३ का सांसद अनन्त पौडेलले मुआब्जा नदिई व्यक्तिगत संरचना राज्यले भत्काउन नदिने बताए । उनले  सडक र नापी कार्यालयले नक्सांकन गर्नु अघि बसेको बस्ती सडक कार्यालयको सम्पत्ति हुनै नसक्ने बताए ।
राज्यलाई हालसम्म पनि मालपोत तिर्दै आएको र मालपोत कार्यालयबाट खरीदबिक्री समेत हुदै आएकोले क्षतिपूर्ति दिनु पर्ने हेटौडा बसोबास संरक्षण समितिका संयोजक राजकुमार न्यौपानेले बताएका छन् । बैकल्पिक मार्गको अवधारणा आए त्यसको लागि आफूहरु सकारात्मक रहेको समेत बताएका छन् । 
सभामा मउवासंघका पूर्व अध्यक्ष उत्तम शर्मा ढकाल, महासचिव महेन्द्र राउतले आफ्नो धारणा राखेका थिए । विरोध सभामा नेपाली काँग्रेस, माओवादी केन्द्र, नेकपा माले लगायत राजनैतिक दलहरुले समेत ऐक्यबद्धता जनाएका थिए । डिभिजन सडक कार्यालयले २५ मीटर भित्र पर्ने सरकारी स्वामित्वका भौतिक संरचना भत्काई सकेको छ भने निजी घरटहरा हटाउन गरेको १५ दिने सूचनाको म्याद सोमबार सकिएको छ ।