को हुन्छ त हेटौँडा अस्पतालको अध्यक्ष ?

४ माघ, हेटौँडा । आफ्नो समय सकिनु २ दिन अघि हेटौँडा अस्पतालका अध्यक्ष सुनिल मोक्तानले राजिनामा दिएपछि नयाँ अध्यक्ष नियुक्तिका लागि कसरत तिब्र बनेको छ । नेपाली काँग्रेसको कोटामा स्वास्थ्य मन्त्रालय रहेकाले नेपाली काँग्रेसमा अध्यक्ष बन्ने होड शुरु भएको हो ।

मकवानपुरबाट काँग्रेसका केही नेताहरु अध्यक्ष नियुक्तिका लागि केन्द्रमा दौडधुपमा जुटेको स्रोतको दावि छ । केही समय अघि आधा दर्जन नेताहरुले इच्छा राखेपनि योग्यताको विषय उठेपछि पछिल्लो समय तीन जनाको नाम चर्चा रहेको छ ।

स्रोतका अनुसार नेपाली काँग्रेसका नेता रमेश गिरी, विद्यार्थी नेता एवं उद्योग बाणिज्य संघका महासचिव महेन्द्र राउत र नेपाल सरकारका पूर्व उपसचिव तिर्थराज पराजुलीको नाम चर्चामा छ । पराजुली हाँडिखोलाका बासिन्दा हुन् । उनले करिव २ बर्ष अघि सरकारी सेवाबाट अवकाश प्राप्त गरेका थिए । प्रमुख जिल्ला अधिकारीको अनुभव समेत हासिल गरेका उनलाई अध्यक्ष बनाउन एक समूह लागि परेको छ । एक महिना अघिदेखि उनको नाम काँग्रेसीजनमा चर्चामा रहेको छ । उनी नेपाली काँग्रेसका महाधिवेशन एवं महासमिति सदस्य भरत पराजुलीका दाजु हुन् । अन्य राजनैतिक दलले समेत उनको नाममा सकारात्मक प्रतिक्रिया दिएको जनाईन्छ ।

तर काँग्रेस जिल्ला बृत्तमा भने जिल्लामा सक्रिय नेता कार्यकर्तालाई नै अवसर दिनुपर्ने आवाज उठिरहेको छ । पार्टीमा उपसभापति भईसकेका र डिएलएमा सक्रिय गिरीलाई अध्यक्ष बनाउनुपर्ने भन्दै एक टोली राजधानी पुगेको जनाईन्छ ।

विद्यार्थी राजनीति र व्यवसायिक बृतमा सक्रिय राउतलाई अध्यक्ष बनाउन केन्द्रमा समेत सकारात्मक पहल भईरहेको उनी निकट स्रोतको दावि छ । आफुलाई पनि योग्य उम्मेदवारको रुपमा स्वास्थ्यमन्त्री गगन थापा समक्ष राउतले दावि प्रस्तुत गरेका छन् । उनीहरुमध्ये कसैलाई पनि पार्टी जिल्लाबाट सिफारिस भई नसकेको एक जिल्ला सदस्यले दावि गरे ।