फुटवल : शान्तिटोल र राईजहाई फाइनलमा प्रवेश

शान्तिटोल स्पोटर्स क्लब

१७ असोज, हेटौँडा । हेटौडा–६ मा रहेको भित्रि फुटवल टीमले आयोजना गरेको ६ नं. वडा टोल स्तरीय  फुटवल प्रतियोगिताको शुक्रवार भएको खेलमा राईजहाई फुटवल टीम र शान्तिटोल स्पोटर्स क्लब फाईनलमा प्रवेश गरेका छन् । 
बंशगोपाल युवा क्लव र राइजहाई फुटवल टीमविच भएको शुक्रबारको पहिलो सेमिफाईनल खेल गोलरहित बराबरीमा सकिए पछि खेल टाईब्रेकरमा पुगेको थियो । टाईब्रेकरमा राइजहाई फुटवल टिम २–१ ले विजयी भएको हो ।  विजयी टिमको तर्फबाट  कृष्ण श्रेष्ठ र आलोक श्रेष्ठले गोल गरेका थिए भने बंशगोपाल बी को तर्फबाट रोजन बलामीले गोल गरेका थिए । 
यसैगरी, दोश्रो खेलमा शान्तिटोल स्पोटर्स र बंशगोपाल युवा क्लव सी विच भएको खेल अवधीभर २–२ गोल भएपछि खेल टाईबे्रकरमा पुगेको थियो । टाइब्रेकरमा शान्तिटोल स्पोटर्स क्लव ३–१ ले विजयी भएको हो  । विजयी टीमको तर्फबाट रितेश अधिकारी, रिवाज बयलकोटी र सन्तोष राईले गोल गरेका थिए भने बंशगोपाल सी को तर्फबाट निशान घिमिरेले गोल गरेका थिए । शुक्रबारको खेलको म्यान अफ दि म्याच शान्तिटोल स्पोटर्स क्लवका गोलकिपर सुशिल आचार्य र राईजहाईका गोलकिपर निर्मल राई घोषित भए ।  
शनिबारको फाइनल खेलमा बिजेटा टीमले २५ देखि ३० किलोको खसी  र उपविजेताले २० देखि २५ किलोको खसी, मेडल तथा प्रमाणपत्र प्राप्त गर्ने क्लवका अध्यक्ष कमल कोईरालाले बताए । प्रतियोगितामा वडाका १४ टीमको सहभागिता रहेको छ ।