आईएसआईको निर्देशनमा काम गर्ने ५ नेपाली पक्राउ

२५ माघ, बारा । पाकिस्तानी गुप्तचर संस्था आईएसआईको निर्देशनमा आपराधिक गतिविधी गर्दै आएका ५ नेपालीलाई बारा प्रहरीले पक्राउ गरेको छ । विभिन्न समयमा पक्राउ परेका उनीहरूलाई  प्रहरीले मंगलवार सार्वजनिक गरेको छ ।
प्रहरीले आईएसआइका लागि आपराधिक गतिविधी गरेको अारोपमा पक्राउ परेका बारा कलैया नगरपालिका ८ का ४८ बर्षीय सम्सुल होदा, महागढीमाई नगरपालिका तेगछीयाका २७ बर्षीय बृजकिशोर गिरी, कलैया नगरपालिका ४ का २४ बर्षीय आशीष सिंह, कलैया नगरपालिका १० का ३५ बर्षीय मोजाहीर अन्सारी र कलैया नगरपालिका ४ का २३ बर्षीय उमेश कसमार कुर्मीलाई सार्वजनिक गरेको हो ।
जिल्ला प्रहरी कार्यालय बारामा आयोजित पत्रकार सम्मेलनमा उनीहरूलाई सार्वजनिक गरिएको हो । बाराको करैया जंगलमा पुस १३ गते घाटी रेटेर हत्या गरिएको अवस्थामा फेला परेका भारत आदापुरका दीपक राम र अरुण रामको हत्या आईएसआईको निर्देशनमा भएको खुलेपछि होदालाई नेपाल प्रहरीले इन्टरपोलको मद्दतमा दुवईबाट पक्राउ गरी सोमबार साँझ बारा ल्याइएको बाराका प्रहरी उपरीक्षक नरेन्द्रप्रसाद उप्रेतीले जानकारी दिए । 
पत्रकार सम्मेलनमा भारतको घोडासहनस्थित रेल्वे ट्रयाकमा बम राख्नका लागि होदाले बृजकिशोर गिरी मार्फत् रक्सौल गम्हरीका उमाशंकर पटेललाई ८ लाख भारु पेश्कीका रुपमा दिएका थिए । काम सफल भए होदाले तीन करोड रुपैयाँ गिरी र उनलाई सहयोग गर्नेलाई दिने सम्झौता गरि ८ लाख रूपैयाँ पेश्की दिएका थिए । पेश्की रकम उमाशंकरले भारत आदापुरका दीपक र अरुणलाई दिई रेल्वे ट्रयाकमा बम राख्न लगाए पनि काम सफल भएन । 
काम नभएपछि होदाले रकम फिर्ता लिन बृजकिशोरलाई भनेपनि अरुण र दीपकले रकम फिर्ता नगरेपछि बृजकिशोरले गत पुस १० गते बाराको करैया जंगलमा बोलाएर मोजाहीर, उमेश र आशीषको सहयोगमा बोलाएर अरुण र दीपकको घाटी रेटेर हत्या गरेको प्रहरीले खुलासा गरेको थियो ।पक्राउ परेकाहरूमाथि अनुसन्धान बढाईएको प्रहरीको भनाई छ ।