सामुदायिक वनको अधिकार कटौतिको विरोध

२५ माघ, हेटौँडा । सरकारले सामुदायिक वन समूहको अधिकार कटौति गर्दै लगेको भन्दै सरोकारवालाहरुले विरोध गरेका छन् । हेटौँडा रेञ्जपोष्ट महासंघसँग सामुदायिक वन उपभोक्ता महासंघ (फेकोफन) केन्द्रिय कार्यालयमा भएको अन्तरक्रियामा महासंघका केन्द्रिय पदाधिकारीहरुले अधिकार कटौतिको विरोध गरेका हुन् । 
कार्यक्रममा केन्द्रिय अध्यक्ष गणेशबहादुर कार्की, उपाध्यक्ष भीमप्रकाश खड्का, महासचिव भारती पाठक, सचिव तिर्थबहादुर शाही, सचिवालय सदस्य पार्वता गौतम लगायतले चुरे वन संरक्षण र बैज्ञानिक वन व्यवस्थापन कार्यक्रमले सामुदायिक वनको अधिकार कटौति गरेको बताए । उनीहरुले सरकारले सामुदायिक वनको हित विपरित विभिन्न ऐन, नियम र मार्गनिर्देशन ल्याई उपभोक्ताको अधिकार कटौति गरेको भन्दै यसको विरोधमा एकजुट हुन सामुदायिक वन समूहलाई आग्रह गरे । कार्यक्रममा फेकोफन केन्द्रिय कार्यालय गरिरहेका काम र नयाँ संविधान अनुसार फेकोफनको सात प्रदेशको खाकाबारे जानकारी दिईएको थियो । 
अन्तरक्रियापछि पाटन औद्योगिक क्षेत्र पुगेको हेटौँडा रेन्जपोष्टको टोलीलाई उड कार्मिङ इण्डष्ट्रिजकी सुपरभाईजर विना खड्काले उद्योगले काठबाट तयार गर्ने हस्तकलाका सामग्रीहरुको बारेमा जानकारी दिएकी थिईन् । टोलीले राष्ट्रिय कला संग्राहलय भक्तपुर, ५५ झ्याले दरबार, तलेजु भगवतिको मन्दिर, मकर मेला लाग्ने काभ्रेको वनेपामा रहेको इन्द्रेश्वर महादेव मन्दिरको अवलोकन गरेको टोलीमा सहभागी रानी सामुदायिक वनका कार्यालय सचिव भीमसेन पौडेलले बताए ।
काभ्रे पुगेको टोलीलाई काभ्रेको धनेश्वर बैकिवा सामुदायिक वन उपभोक्ता समूहका सचिव बद्री अधिकारीले समूहले गरेको गतिविधि र फेकोफन काभ्रेका अध्यक्ष विनोदप्रसाद सापकोटाले काभ्रेका सामुदायिक वनको अवस्थाबारे जानकारी दिएका थिए । टोलीले मंगलबार नै ऐतिहासिक सिन्धुली गढीको समेत अवलोकन गरेको छ ।