प्याव्सन मकवानपुर : आज परीक्षा हुन्छ, भोली ठेगान छैन

Sketch

६ चैत, हेटौंडा । प्याव्सन मकवानपुर अन्तरगत संचालन हुन लागेको परीक्षाबारे अन्यौलता उत्पन्न भएको छ । केही संस्थागत विद्यालयले सरकारले तोके अनुसार चैत ५ गतेभित्र परीक्षा सकेका छन् भने केही विद्यालय भने विहिबारबाट परीक्षा शुरु गर्दैछन् ।

यसले गर्दा अभिभावकमा अन्यौलता शुरु भएको छ । सरकारले एसइई लगायतका परीक्षा स्थगित गरिसकेको अवस्थामा प्याव्सन मकवानपुर अन्तरगत हुने परीक्षाबारे अभिभावकहरु अन्यौलमा परेका छन् । प्याव्सन मकवानपुरका कार्यवाहक अध्यक्ष विनोद सुवेदीले प्याव्सन अन्तरगतका विद्यालयहरुमा विहिबारको परीक्षा हुने बताए । विहिबार दिउँसो उपमहानगरपालिका अन्तरगतको शिक्षा समितिसहितको बैठक रहेको बताउँदै उनले त्यसपछि थप निर्णय लिने बताए । विद्यार्थीको स्वास्थ्यबारे आफुहरु चनाखो रहेको बताउँदै उनले विहिबार दिउँसो परीक्षाबारे थप निर्णय हुने बताए । 

यता, स्वास्थ्य क्षेत्रका अगुवा एवं मेलानका केन्द्रीय सचिवालय सदस्य उत्सव चौलागाईले सामाजिक सञ्जालमार्फत स्वास्थ्यबारे ख्याल गर्न सुझाव दिएका छन् । उनले परिस्थतिको गम्भिर विश्लेषण गर्दै परीक्षा केही समय पर सार्न समेत उनले संस्थागत विद्यालयसम्बन्धी संस्थाको ध्यानाकर्षण गराएका छन् ।

प्याव्सन अन्तरगत १ देखि ७ सम्मको परीक्षा विहिबारबाट शुरु हुँदैछ । कतिपय संस्थागत विद्यालयले परीक्षा सकिसकेका छन् भने कतिपयको परीक्षा चलिरहेको छ र कतिपयको विहिबारबाट संचालन हुँदैछ । संस्थागत विद्यालयहरुमध्ये प्याव्सन र एनप्याव्सन आवद्ध र आवद्ध नरहेकाबीचमा एकरुपता नरहँदा संस्थागत विद्यालयको परीक्षाबारे अन्यौलता देखिएको छ ।