प्रदेश-३ मा नेपाली कांग्रेसको रणनीतिक जीत

२६ पुस, हेटौँडा । ३ नम्बर प्रदेशमा प्रदेशको स्थायी राजधानी र नामकरणको विषयमा नेपाली कांग्रेसले रणनीतिक जित हासिल गरेको छ । नेपाली कांग्रेसले शनिबार दर्ता भएको प्रदेश राजधानी हेटौँडा र नाम बागमतिमा रणनीतिक जित हासिल गरेको हो ।
अहिलेसम्मको अंकगणितीय हिसाबले प्रदेशको राजधानी मकवानपुरको हेटौँडा र नामकरण बागमति हुने निश्चित छ । नेपाली कांग्रेस आप्mना पार्टी सभापति एवं तत्कालिन प्रधानमन्त्री शेरबहादुर देउवा नेतृत्वको सरकारले तोकेको राजधानी हेटौँडालाई स्थायी बनाउन सफल हुने भएको छ भने साझा नाम बाग्मतिको प्रस्ताव गरेर रणनीतिक जितमा पुगेको हो । 
‘कांग्रेस सभापति शेरबहादुर देउवाले तोकेको राजधानी स्थायी हुन लागेको र साझा नाम बागमतिसमेत प्रस्ताव गरेर रणनीतिक रुपमा कांग्रेसले जीत हासिल गरेको छ ।’–कांग्रेस प्रदेशसभा सदस्य निमा लामाले भने । यसमा कांग्रेसले मात्रै नभई देशले नै जितेको उनको भनाई थियो । 
२ बर्ष अघिदेखि आफ्नो दलले पटक–पटक यसअघि तोकेको अस्थायी राजधानीलाई स्थायी बनाउन संसदसमेत अवरुद्ध गरेको भन्दै नेपाली कांग्रेसका प्रदेशसभा सदस्य सन्तबहादुर प्रजाले निर्णय हुने दिनमा पुग्दा आफुहरु उत्साही भएको बताए । ‘नेपाली कांग्रेस केन्द्रीय पार्टी सभापति शेरबहादुर देउवा नेतृत्वको सरकारले अस्थायी राजधानी हेटौँडा तोक्नु र मकवानपुर सभापति एवं ३ नम्बर प्रदेश संसदीय दलका नेता इन्द्रबहादुर बानियाँबाट साझा नाम बाग्मति प्रस्ताव गर्नु कांग्रेसको महत्वपूर्ण उपलव्धी हो ।’–प्रजाले भने । 
नेपाली कांग्रेस परिस्थितिको मूल्यांकन गरी सकारात्मक निर्णय गर्न सफल रहेको कांग्रेस सांसदहरुको भनाई छ । प्रदेशसभामा नेपाली कांग्रेसका २२ प्रदेशसभा सदस्य छन् । प्रदेशको राजधानी र नामकरणबारे आइतबार औपचारिक निर्णय हुँदैछ ।