फुँयाललाई बधाई दिंदै मूख्यमन्त्री पौडेलले भने– ‘जे पर्ला पर्ला’ (भिडियो)

५ फागुन, हेटौंडा । भौतिक पूर्वाधार विकास मन्त्री नियुक्त भएपछि रामेश्वर फुँयालले सोमबार प्रदेश प्रमुख विष्णुप्रसाद प्रसाईबाट सपथग्रहण गरे । 
माघ २९ गते नै ‘मन्त्री’ पदको सपथग्रहणको तयारी भएर स्थगित हुन पुगेपछि मूख्यमन्त्री डोरमणी पौडेल पनि केही असन्तुष्ट देखिन्थे । त्यो असन्तुष्टीलाई सन्तुष्टीमा बदल्ने मौका भने पौडेल र फुँयालले सोमबार साँझ मात्रै पाए । सोमबार साँझ ५ बजे प्रदेश प्रमुख प्रसाईले सपथग्रहण गराएपछि शुरु भयो फुयाँललाई बधाई दिने क्रम । पहिले उनलाई प्रदेश प्रमुख प्रसाईले नै सफल कार्यकालको शुभकामना दिए । 
त्यसपछि पालो आयो मूख्यमन्त्री डोरमणी पौडेलको । पौडेलले किस्तीबाट माला उठाए, अबिर लिए । मूख्यमन्त्री खुशीको मुद्रामा हाँसिरहेका थिए भने संगै रहेका सभामुख सानुकुमार श्रेष्ठले मूख्यमन्त्रीलाई साथ दिईरहेका थिए । पछाडि थिए प्रदेश सरकारका मन्त्रीहरु । टिका र माला लगाईदिएपछि बधाई दिंदै हात मिलाएर मूख्यमन्त्रीले भने ‘ल, जे पर्ला पर्ला ।’ संगै रहेका प्रदेश सरकारका प्रवक्ता एवं आर्थिक मामिला तथा योजना मन्त्री कैलाश ढुंगेलले थपे–‘जे पर्ला पर्ला, परेको व्यहोरौंला ।’ हाँसोको फोहरा छुट्यो एकछिन । दुबैको अभिव्यक्तिमा ‘ठूलै युद्ध’ जितेको भाव झल्किन्थ्यो ।’ 
सबै घटना नियालीरहेका एक प्रत्यक्षदर्शीले भने–‘प्रदेश सरकार गठनको २ बर्ष पुगेको अवसरमा फुँयाललाई मन्त्री पद ‘गिफ्ट’ दिन खोजेका मूख्यमन्त्री पौडेललाई अन्तिम समयमा पछि हट्नु परेपछि आत्मसम्मानमा ठेस पुगेको थियो भन्ने कुरा सपथग्रहणको खुशीयालीमा झल्किएको हो ।’