कोरोना कहरः १६ हजार ८९२ जनाको मृत्यु

१२ चैत्र, हेटौंडा । विश्वभर महारामारीको रुपमा फैलिरहेको कोभिड–१९ को संक्रमणबाट विश्वभर मृत्यु हुनेको संख्या १८ हजार ८९२ पुगेको छ । ४ लाख २२ हजार ६१४ जनामा भाइरस संक्रमणको पुष्टि भइसकेको छ । 
१ लाख ८ हजार ८७९ जना उपचारपछि घर फर्किएका छन् । कोरोना भाइरस संक्रमण चीनबाट सन् २०१९ को डिसेम्बरमा सुरू भएपनि अहिले युरोप यसको केन्द्रविन्दु बनेको छ । 
सबैभन्दा धेरै मानिसको मृत्यु इटलीमा भएको छ । इटालीमा कोरोनाका कारण मृत्यु हुनेको संख्या ६ हजार ८ सय २० जना पुगेको छ । पछिल्लो २४ घण्टामा इटालीमा मात्रै ७ सय ४३ जनाको ज्यान गएको छ । 
यसैगरी स्पेनमा पनि मर्नेको संख्या तिब्रगतिमा बढिरहेको तथ्याङकले देखाएको छ । पछिल्लो २४ घण्टामा स्पेनमा ६ सय ८० जनाको मृत्यु भएसँगै यहाँ मर्नेको संख्या २ हजार ९ सय ९१ पुगेको छ । यस्तै अमेरिकामा कोरोनाको संक्रमण दर ह्वात्तै बढेको छ । पछिल्लो चौविस घण्टामा अमेरिकामा ९ हजार ९ सय २१ जनामा संक्रमण भएको छ भने मृत्यु हुनेको संख्या ६ सय ९८ पुगेको छ । 
यसैगरी जर्मनीमा पनी संक्रमित र मर्नेको संख्या पछिल्लो समयमा निकै बढेको तथ्यांकले देखाएको छ । पछिल्लो २४ घण्टाको अवधिमा जर्मनीमा ३ हजार ९ सय ३५ जना नयाँ संक्रमित थपिएका छन भने मृत्यु हुनेको संख्या १५९ पुगेको छ । 
यता मध्यपूर्वका राष्ट्रहरुमध्ये इरानमा कोरोना भाइरसको संक्रमण सबैभन्दा डरलाग्दो अवस्थामा छ । त्यहाँ कोरोनाकै कारण १ हजार ९ सय ३४ जनाको मृत्यु भएको छ भने  २४ हजार ८ सय ११ जना संक्रमित छन् । 
यसैगरी सार्क राष्ट्रहरुमा पाकिस्तानमा सबैभन्दा धेरै ९ सय ७२ जनामा संक्रमण भएको पुष्टि भएको छ भने अहिलेसम्म ७ जनाको मृत्यु भएको छ । 
यस्तै छिमेकि देश भारतमा पनि संक्रमितको संख्या दिनानुदिन बढिरहको छ । भारतमा ५ सय ३६ जनामा संक्रमण भएको छ भने १९ जनाको मृत्यु भएको छ । 
यसैगरी श्रीलंकामा १०२, अफगानिस्तानमा ७४ माल्दिभ्समा १३, भुटान २ जनामा संक्रमण भएको पुष्टि भएको छ । नेपालमा दुईजनामा संक्रमण भएकोमा एकजना उपचारपछि घर फर्किसकेका छन् भने एकजनाको उपचार चलिरहेको छ ।