दक्षिण एसियामा कोरोनाः भारतमा ११७ को ज्यान गयो

२४ चैत्र, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ ले दक्षिण एसियाका देशहरुमा पनि आफनो प्रभाव देखाइरहेको छ ।
दक्षिण एसियाली देशहरुमा कोरोनाको संक्रमणबाट सबैभन्दा बढी भारतमा १ सय १७ जनाको मृत्यु भएको छ । पछिल्लो समय १८ जनाको थप मृत्यु भएपछि भारतमा मर्नेको संख्या १ सय १७ पुगेको हो । 
यस्तै भारतमा संक्रमितको संख्या पनि दक्षिण एसियामा सबैभन्दा बढी छ । यहाँ कोरोना संक्रमितको संख्या ४ हजार २ सय ८८ पुगेको छ । पछल्लो २४ घण्टामा मात्रै यहाँ ७ सयजना नयाँ संक्रमित थपिएका छन् । यस्तै भारतमा ३ सय २८ जना उपचारपछि स्वस्थ्य भएका छन् । 
भारतपछि कोरोनाको संक्रमणबाट मर्नेको संख्या पाकिस्तानमा बढी छ । पाकिस्तानमा अहिलेसम्म ४७ जनाको ज्यान गएको छ । थप ३ सय ३९ जना नयाँ संक्रमित थपिएसँगै पाकिस्तानमा संक्रमितको कुल संख्या ३ हजार १ सय ५७ पुगेको छ । 
यस्तै बंगलादेशमा कोरोना संक्रमणबाट ९ जनाको मृत्यु भएको छ भने ८८ जना संक्रमित भएका छन् । यसैगरी अर्को दक्षिण एसियाली मुलुक श्रीलंकामा कोरोनाका कारण अहिलेसम्म ५ जनाले ज्यान गुमाएका छन् भने १ सय ७६ जना संक्रमित छन् । 
कोरोना संक्रमणबाट माल्दिभ्समा अहिले सम्म कसैको पनि मृत्युभएको छैन । तर यहाँ अहिलेसम्म १९ जना संक्रमित भइसकेका छन् । 
यसैगरी नेपालमा कोरोना भाइरसको संक्रमणबाट ९ जना संक्रमित भएकामा एक जना उपचार पछि निको भएका छन् । 
भुटानमा पनि कारोना संक्रमण फैलिएको छ । यहाँ अहिले सम्म ५ जना संक्रमित भएका छन् भने दुईजना उपचारपछि निको भएका छन् ।