मकवानपुरका चेपाङले सामुहिक रुपमा मनाए न्वागी

२३ भदौ, हेटौंडा । सिमान्तकृत चेपाङ समुदायले आफनो संस्कृती र  पहिचान जोगाउने उद्धेश्यले मंगलवार मकवानपुरको राक्सिराङको चैनपुरमा सामुहिक रुपमा छोनाम (न्वागी) पर्व मनाएका छन्  । 
विगतमा घर÷घरमा मनाउदै आइएको न्वागी पर्व यो वर्ष भने नेपाल चेपाङ संघले राक्सिराङ गाउँपालिकाको केन्द्र चैनपुरमा साँस्कृतिक कार्यक्रमसहित न्वागी पर्व मनाएका हुन् । कोरोनाको कारणले गत वर्ष चेपाङहरुले सामुहिक रुपमा न्वागी पर्व मनाएनन् ।  चेपाङ समुदायको सवैभन्दा महत्वपुर्ण र ठुलो धार्मिक पुजा छोनाम (न्वागी) पर्व भदौ २२ गते मनाउने गर्छन । कार्यक्रमको प्रदेश सभा सदस्य एवं पूर्वगृह राज्यमन्त्री ईन्द्रवहादुर बानियाँले मंगलवार वेलुका चेपाङको एक पाखे ढ्याङग्रो ठोकेर उद्घाटन गरेका थिए । पर्वको शुभकामना दिंदै प्रदेश सभा सदस्य वानियाँले भाषा र संस्कृतिले जातजातीहरुको संरक्षण गर्ने वताए । संस्कृति वाचेमात्र जातजातीहरु वाचिरहने उनले तर्क गरे । न्वागी पर्व सम्पन्न गर्नका लागि वानियाँले ५० हजार रुपैंया उपलब्ध गराएका थिए । 
कार्यक्रममा प्रमुख अतिथी वानियाँले चेपाङ भाषा तयार गर्न लागेको फिल्मको शुभमुहर्तमा नरिवल फोडेका थिए । राक्सिराङ गाउँपालिका चेपाङ संघका अध्यक्ष सोमलाल चेपाङको सभापतित्वमा संचालित उक्त कार्यक्रममा प्रदेश सभा सदष्य सन्तवहादुर चेपाङ, गाउँपालिकाका अध्यक्ष राजकुमार मल्ललगायत चेपाङ समुदायका अगुवाहरुले न्वागी पर्वको अवसरमा शुभकामना व्यक्त गरेका थिए । नेपाल चेपाङ संघको सक्रियतामा आयोजना गरिएको न्वागी पर्वमा सहभागी भएका चेपाङलगायत गैर चेपाङहरुलाई चेपाङ समुदायका अगुवा गायक रविन चेपाङले चेपाङ भाषाको गीतले स्वागत गरेका थिए  । मकवानपुर,चितवन र धादिङका अगुवा चेपाङहरुको उक्त कार्यक्रम सहभागीता थियो । अधिकांश चेपाङ अगुवाहरुले न्वागीको दिन सरकारले सार्वजनिक विदा नदिएकोमा चेपाङ समुदायका अगुवाहरुले  आक्रोश पोखेका थिए ।
२०६८ सालको जनगणना अनुसार मुलुकमा ६८ हजार ३ सय ९९ चेपाङको जनसंख्या रहेको छ । मकवानपुरमा ९ हजार ७ सय ७८ पुरुष र ९ हजार ३ सय ७४ महिलासहित १९ हजार १ स ५२ जना चेपाङको वसोवास छ ।