सिद्धार्थ मावि मतदान केन्द्रमा महिला कर्मचारी

१० फागन, हेटौंडा । फागुन २१ हुने प्रतिनिधिसभाको निर्वाचनका लागि यति बेला मतदान अधिकृत तथा सहायक मतदान अधिकृत खटाउने काम भइरहेको छ । 
२ ओटा निर्वाचन क्षेत्र रहेको मकवानपुरमा पनि निर्वाचन सम्पन्न गराउन कर्माचारी खटाउने क्रम जारी रहेको छ । मकवानपुरमा निर्वाचनका लागि २ हजार २४४ कर्मचारी खटिने भएका छन् । मकवानपुरका दुई निर्वाचन क्षेत्रमध्ये मकवानपुर क्षेत्र नम्बर १ मा १ हजार ६८ कर्मचारी खटाइने भएको छ । जहाँ ६२ मतदानस्थलअन्तर्गत १७८ मतदान केन्द्र रहका छन् । यस्तै मकवानपुर क्षेत्र नम्बर २ मा १०५ मतदानस्थलअन्तर्गत १९६ मतदान केन्द्रमा १ हजार १७६ कर्मचारी खटिने जनाइएको छ । 
यसै क्रममा हेटौंडा उपमहानगरपालिका- वडा नम्बर २ सिद्धार्थ माध्यमिक विद्यालयमा रहेको मतदानस्थलमा मतदान अधिकृतदेखि सबै कर्मचारी र सुरक्षाकर्मी महिला मात्र खटाइने मुख्य निर्वाचन अधिकृत गीता श्रेष्ठले जानकारी दिइन् । 
सिद्धार्थ माविमा रहेको मतदानस्थलमा ६ वटा मतदान केन्द्र छन् । ती सबै केन्द्रमा मतदान अधिकृत, सहायक मतदान अधिकृत, अन्य कर्मचारी र स्वयसेवकहरु पनि महिला नै राखिएका छन् । यी मतदानस्थलमा खटिने सबै सुरक्षाकर्मी पनि महिला छन् । ती ६ मतदान केन्द्रमा ३६ महिला कर्मचारी र २० महिला सुरक्षाकर्मी परिचालन हुने छन् । उक्त मतदानस्थलमा ५ हजार ४ सय ९३ मतदाता रहेका छन् । वडा नम्बर २ को सो विद्यालय मात्र मतदानस्थल हो । यस अघि २०७९ को निर्वाचनमा पनि सो मतदानस्थलमा महिला कर्मचारीले मतदान सम्पन्न गराएका थिए ।