राप्रपा निर्वाचन समितिद्वारा संशोधित कार्यतालिका सार्वजनिक

२० कार्तिक, हेटौंडा । राष्ट्रिय प्रजातन्त्र पार्टी (राप्रपा) को केन्द्रीय निर्वाचन समितिले सक्रिय सदस्यता वितरण तथा महाधिवेशन प्रतिनिधि छनोटसम्बन्धी संशोधित कार्यतालिका सार्वजनिक गरेको छ ।
समितिको बैठकले सक्रिय सदस्यको नयाँ विवरण प्रविष्ट गर्ने समय बुधबार रातिदेखि बन्द भइसकेकाले प्रविष्ट भएका सदस्यको तोकिएको रकम कात्तिक २१ गतेभित्र बुझाउनुपर्ने निर्णय गरेको छ ।
सदस्यता विवरणमा फोटो छुटेको भए सोही मितिभित्र उपलब्ध गराउनुपर्ने र अन्यथा सक्रिय सदस्यताको आवेदन अस्वीकृत हुने समितिले जनाएको छ ।
संशोधित कार्यतालिकाअनुसार स्वीकृत सक्रिय सदस्यको नामावली कात्तिक ३० गते प्रकाशन गरिनेछ । प्रकाशित नामावलीमा मंसिर १ गतेभित्र दाबी–विरोध तथा नाम सच्याउन सकिनेछ ।
त्यसैगरी, मंसिर ४ देखि १० गतेसम्म पार्टीको विधान तथा निर्वाचन निर्देशिकाबमोजिम योग्य प्रदेशसभा निर्वाचन क्षेत्रका सक्रिय सदस्यहरूमध्येबाट महाधिवेशन प्रतिनिधि छनोट गरिनेछ ।
छनोट भएका महाधिवेशन प्रतिनिधिको तस्बिरसहितको नामावली मंसिर १२ गतेभित्र केन्द्रीय सचिवालय र केन्द्रीय निर्वाचन समितिमा पठाउनुपर्ने निर्णय पनि बैठकले गरेको प्रवक्ता मोहनकुमार श्रेष्ठले जानकारी दिए । उनका अनुसार संशोधित कार्यतालिकाअनुसार सदस्यता प्रमाणीकरण तथा महाधिवेशन प्रतिनिधि छनोट प्रक्रिया अघि बढाइने छ ।