हेटौँडा सिमेन्ट उद्योग 'देशको गौरव' : उद्योगमन्त्री जोशी

२६ मंसिर, हेटौँडा । उद्योगमन्त्री नविन्द्रराज जोशीले हेटौँडा सिमेन्ट उद्योग देशकै गौरव रहेको बताएका छन् । हेटौँडा सिमेन्ट उद्योगको व्यवसायिक उत्पादनको ३१ औं बार्षिकोत्सवमा बोल्दै मन्त्री जोशीले धेरै सरकारी उद्योग बन्द रहँदा पनि संचालनमा रहेको हेटौँडा सिमेन्ट उद्योग देशको गौरवको रुपमा रहेको बताए ।

उनले हेटौँडा सिमेन्ट उद्योगलाई सरकारले विशेष महत्व दिएको भन्दै यसको प्रवद्र्धन प्राथमिकतामा रहेको बताए । यसलाई समय सापेक्ष प्रतिष्पर्धी बनाउन भौतिक एवं जनशक्ति व्यवस्थापनमा ध्यान दिने मन्त्री जोशीको प्रतिवद्धता थियो । मन्त्री जोशीले देशमा बन्द रहेका उद्योग चलाएर औद्योगिक वातावरण तयार गर्न सके बेरोजगारी हटाउन सकिने दावि गरेका छन् । बन्द उद्योग संचालन गरे १० बर्षभित्र देशमा बेरोजगारी समस्या हट्ने दावि गरे । उनले सबै उद्योग संचालनमा आए बैदेशिक रोजगारीमा रहेका नेपालीले समेत नेपालमै काम गर्ने वातावरण तयार हुने बताए ।

सरकारी उद्योग धरासायी बन्दै जानुको कारण पहिल्याएर समस्या समाधानमा आफु जुटेको भन्दै मन्त्री जोशीले गुणस्तर र बजारमा प्रतिष्पर्धाका लागि तत्पर रहनुपर्नेमा जोड दिए । कार्यक्रममा उद्योगका महाप्रवन्धक प्रेमशंकर सिंहले उद्योगको अवस्थाबारे जानकारी दिएका थिए । उद्योगको अधिकृत पूँजी ३ अर्ब, जारी पूँजी १ अर्ब ५० करोड र चुक्ता पूँजी ९० करोड ६ लाख ८५ हजार रुपैँया रहेको छ । उद्योगमा ९० करोड ६ लाख ८५ हजार मूल्यको साधारण शेयर छ । उद्योगको ऋण दायित्व १२ करोड रुपैँया रहेको कार्यक्रममा जानकारी दिईएको थियो । 
उद्योग संचालक समितिका अध्यक्ष रघुरमण न्यौपानेको अध्यक्षतामा भएको कार्यक्रममा सभासद्, राजनैतिक दलका प्रतिनिधि, आर्थिक क्षेत्रका व्यक्तित्व, उद्योगका कर्मचारी लगायतको सहभागिता रहेको थियो ।