यो सरकारले चुनाव गराउँदैन : रावल

२९ माघ, हेटौँडा । नेकपा एमालेका उपाध्यक्ष भिम रावलले वर्तमान सरकारले चुनाव नगराउने दावि गरेका छन् । युवा संघ मकवानपुर जिल्ला कमिटिले हेटौँडामा गरेको अगुवा कार्यकर्ता भेलामा बोल्दै सरकारले संविधान संशोधन लगाएतको विषय देखाएर  निर्वाचन टार्न खोजेको बताए । उपाध्यक्ष रावलले एक तिहाई भन्दा धेरै सांसदहरु विपक्षमा हुँदाहुँदै सरकारले संविधान संसोधन गर्छु भन्दै हिडनु हास्यस्पद भएको उल्लेख गरे । 
जेठसम्म स्थानीय तहको निर्वाचन गर्नुपर्ने बताउँदै रावलले चुनावको मिति समेत घोषणा गर्न नसके सकारको औचित्य समाप्त हुने दावि गरे । कार्यक्रममा बोल्दै एमाले केन्द्रीय सदस्य विरोध खतिवडाले नेपालमा एमालेको आँधीबेरी आएको भन्दै अब राष्ट्र विरोधिहरुलाई बढार्ने चेतावनी दिए । कार्यक्रममा युवा संघ नेपालका पुर्व अध्यक्ष महेश बस्नेत, एमालेका प्रदेश सदस्यहरु कृष्णप्रसाद दाहाल, रामचन्द्र राई, युवा संघका केन्द्रीय कोषाध्यक्ष हिदम लामा, एमाले मकवानपुरकी अध्यक्ष मुनु सिग्देल लगायतले मन्तव्य व्यक्त गरेका थिए । 
कार्यक्रममा विभिन्न पार्टी परित्याग गर्दै ५ सय युवाहरु एमालेमा प्रवेश गरेका छन भने संघिय समाजवादी फोरम निकट विद्यार्थी संगठनका केन्द्रीय सदस्य,सहित सम्पूर्ण जिल्ला कमिटि, मकवानपुरमा रहेका सबै क्षेत्रीय कमिटि र क्याम्पस कमिटिका सदस्यहरु एमालेमा प्रवेश गरेका छन् । युवा संघका जिल्ला अध्यक्ष सन्तोष चौलागाँईको अध्यक्षतामा भएको कार्यक्रम भएको थियो ।
तस्विर सौं.– खबरब्रेक डटकम