राष्ट्रिय सभाका १९ सदस्यको निर्वाचन माघ ९ गते

२४ मंसिर, काठमाडौं । राष्ट्रिय सभाका १९ सदस्यहरुको निर्वाचन माघ ९ गते हुने भएको छ ।
२ बर्षको पदावधी सकिन लागेका १९ जना सांसदहरुको निर्वाचन माघ ९ गते गर्न निर्वाचन आयोगले प्रधानमन्त्री केपि शर्मा ओलीसंग प्रस्ताव गरेको हो । मन्त्रीपरिषदबाट मिति तोकेपछि आयोगले प्रक्रिया अगाडि बढाउने प्रमुख निर्वाचन आयुक्त दिनेशकुमार थपलियाले बताए । उनीहरुको पदावधी फागुन २० गते सकिंदैछ । पदावधि सकिनुभन्दा ३५ दिन अघि नै निर्वाचन गर्नुपर्ने कानुनी प्रावधान छ । २ बर्षे पदावधी सकिनेमा नेकपाका ९, कांग्रेसका ७ र राजपाका २ र समाजवादी पार्टीका १ सांसद छन् ।
नेकपाका युवराज खतिवडा, कमलाकुमारी वली, कालीबहादुर मल्ल, खेमराज नेपाली, बलरामप्रसाद बाँस्कोटा, मीना बुढा, युटोल तामाङ, राजकुमार कुँवर र हरिचरण शिवाकोटीको पदावधि सकिंदैछ । कांग्रेसका धनकुमारी खतिवडा, बद्रिप्रसाद पाण्डे, दुर्गाप्रसाद उपाध्याय, मुक्ताकुमारी यादव, सुरेन्द्रराज पाण्डे, विन्दादेवी आले राना र सरिता प्रसाईं, राजपाका रमेशप्रसाद यादव र वृषेशचन्द्र लाल र समाजवादी पार्टीका रामप्रित पासवानको पदावधि सकिंदैछ । राष्ट्रपतिबाट मनोनित युवराज खतिवडाको स्थानमा राष्ट्रपतिबाटै अर्का सदस्य मनोनित हुनेछन् भने बाँकीको निर्वाचन प्रक्रिया हुनेछ ।
राष्ट्रिय सभाको पदावधी ६ वर्ष रहने भनिए पनि पहिलो पटकका लागि एक तिहाइको पदावधि २ वर्ष, अर्को एक तिहाइको ४ वर्ष र  अर्को एक तिहाइको ६ वर्ष रहने संवैधानिक व्यवस्था छ ।