३ महिनादेखि प्रदेश ३ को प्रदेशसभा सुनसान

३० मंसिर, हेटौँडा । ३ महिना अघिसम्म चहलपहल रहने ३ नम्बर प्रदेशको प्रदेशसभामा अहिले सुनसान छ । हेटौँडामा रहेको प्रदेशसभामा अहिले केही कर्मचारी र सुरक्षाकर्मी मात्रै देखिन्छन् । 
भदौं २५ गतेदेखि स्थगित भएको प्रदेशसभा बैठक अहिलेसम्म बस्न सकेको छैन । प्रदेशसभा बैठक कहिले बस्छ भन्ने पनि अहिलेसम्म निश्चित छैन । प्रदेशसभाको बर्षे अधिवेशन समाप्त भएपछि न कर्मचारीहरुलाई कुनै कामको चाप छ, न प्रदेशसभा सदस्यहरुलाई नै । उनीहरु पनि कहिले प्रदेशसभा संचालन हुन्छ भन्ने प्रतिक्षामा छन् । 
प्रदेशसभालाई काम दिन नसक्नु प्रदेश सरकारको कमजोरी रहेको ३ नम्बर प्रमुख प्रतिपक्ष दल नेपाली कांग्रेसका नेता इन्द्रबहादुर बानियाँ बताउँछन् । ‘विधेयक ल्याएर छलफल गर्ने वातावरण तयार गर्ने र राजधानीको नाम र स्थान टुंगो लगाउनु पर्ने हो ।’–बानियाँ भन्छन्–‘२ तिहाई बहुमत हुँदा पनि काम गर्न नसक्नु सरकारको कमजोरी हो ।’ उनले यथाशिघ्र संसद बोलाउन प्रमुख प्रमुखलाई आग्रह गर्न सरकारको ध्यानाकर्षण गराएका छन् ।
प्रदेश भएका कैयौ महत्वपूर्ण विषय संसद संचालन नहुँदा छलफलमा आउन सकेको छैन । तर प्रदेश सरकारले हिउँदे अधिवेशन आव्हानका लागि प्रदेश प्रमुखलाई आग्रह नगर्दा प्रदेशसभा संचालन हुन नसकेको हो । प्रदेश सरकारले अहिलेसम्म प्रदेशसभामा कुनै पनि विधेयक दर्ता गरेको छैन । यसअघि दर्ता भएका सबै ४५ वटा विधेयक पारित भईसकेका छन् भने ४४ वटा प्रमाणिकरण समेत भईसकेका छन् । विधेयक नहुँदा प्रदेशसभा संचालन हुन नसकेको सभामुख सानुकुमार श्रेष्ठ बताउँछन् । ‘प्रदेश सरकारको मन्त्रीपरिषद बैठकले अधिवेशन आव्हानका लागि आग्रह गरेपछि प्रदेश प्रमुखबाट आव्हान गर्ने प्रावधान छ ।’–उनले भने । तर सरकारले प्रक्रिया थालेको छैन ।
विधेयक नहुँदा मिनि संसदको रुपमा चिनिने संसदीय समितिको बैठक पनि कम भएको छ । केही समितिको बैठक बसेर सरकारको कामको अनुगमन लगायतका काम गरेपनि अन्य निस्क्रिय रहेको छन् । ३ महिनादेखि प्रदेशसभा सदस्य कामविहिन छन् । त्यसैले संसदमा विधेयक ल्याएर प्रदेशसभालाई प्रभावकारी बनाउन प्रदेश सरकारको ध्यान जानु जरुरी रहेको ३ महिनापछि सोमबार हेटौँडामा भेटिएका सांसदहरुको भनाई छ ।