राष्ट्रियसभा निर्वाचनमा नेकपा र राजपा सहकार्य हुने

२ पुस, काठमाडौं । नेपाल कम्युनिस्ट पार्टी (नेकपा) र राष्ट्रिय जनता पार्टी (राजपा) नेपालबीच राष्ट्रियसभा निर्वाचनमा सहकार्य हुने भएको छ । प्रधानमन्त्री निवास बालुवाटारमा बुधबार बसेको दुई दलको बैठकमा यस्तो सहमति भएको हो । 
बैठकपछि राष्ट्रियसभा निर्वाचनका लागि रिक्त हुने चार स्थानमध्ये अन्य पुरुष समूह र अपांगता भएका व्यक्ति वा अल्पसंख्यक समूहको रिक्त दुई स्थानमा राष्ट्रिय जनता पार्टीका उम्मेदवारलाई नेकपाले सहयोग गर्ने सहमति भएको छ । महिला र दलित पुरुष समूहको दुई स्थानमा राजपा नेपालले नेकपाका उम्मेदवारलाई सहयोग गर्ने सहमति भएको छ । 
त्यस्तै सहमतिको दोस्रो बुँदामा अन्य राष्ट्रिय राजनीतिका समसामयीक विषयहरुमा नियमित रुपमा छलफल गर्ने र सहकार्य गर्ने तथा सहकार्यको प्रकृयालाई अघि बढाउने सहमति पनि भएको छ ।
सहमतिपत्रमा प्रधानमन्त्री एवं नेकपाका अध्यक्ष ओली, पुष्पकमल दाहाल ‘प्रचण्ड’ र राजपा नेपालको तर्फबाट राजेन्द्र महतोले हस्ताक्षर गरेका छन् । बैठकमा सचिवालय सदस्य ईश्वर पोखरेल, महासचिव विष्णु पौडेल, स्थायी किमिटि सदस्य सुवास नेम्वाङ, राजपा अध्यक्ष मण्डल सदस्य महन्थ ठाकुर, महेन्द्र यादव, शरदसिंह भण्डारी र राजकिशोर यादवको उपस्थिति रहेको थियो ।