राष्ट्रियसभा निर्वाचनको उम्मेदवारी दर्ता पुस १७ गते

२ पुस, काठमाडौं । निर्वाचन आयोगले राष्ट्रियसभा सदस्य निर्वाचनको कार्यतालिका बुधबार सार्वजनिक गरेको छ ।
सार्वजनिक तालिकाअनुसार यही पुस १७ गते मतदाता नामावली प्रकाशित गरिने र प्रकाशित नामावलीउपर दाबी–विरोधको उजुरी दिन सकिनेछ ।उजुरीउपर छानबिन गरी आयोगले पुस १८ गते राष्ट्रियसभा निर्वाचनको अन्तिम नामावली प्रकाशित गर्नेछ ।
यस्तै, पुस २० गते बिहान १० बजेदेखि दिउँसो ३ बजेसम्म उम्मेदवारको मनोनयनपत्र दर्ता गरिने र सोही दिन मनोनयनपत्र दर्ता गराएका उम्मेदवारको सूची प्रकाशित गरिनेछ । पुस २१ गते उम्मेदवारको विरोधमा उजुरी दिन सकिनेछ ।
आयोगले पुस २२ गते मनोनयनपत्र र उजुरीउपर जाँचबुझ गरी निर्णय गर्नेछ । पुस २३ गते मनोनयन भएका उम्मेदवारको नामावली प्रकाशित गरिनेछ । आयोगले उम्मेदवारले नाम फिर्ता लिनका लागि पुस २४ गते बिहान १० बजेदेखि अपराह्न ४ बजेसम्मको समय निर्धारण गरेको छ ।
पुस २५ गते उम्मेदवारको अन्तिम नामावली प्रकाशित गरिने र सोही दिन उम्मेदवारलाई निर्वाचन चिह्नसमेत प्रदान गर्नेछ । माघ ९ गते बिहान १० बजेदेखि अपराह्न ४ बजेसम्म मतदानको समय निर्धारण गरिएको यसअघि नै तय भइसकेको छ ।
आयोगले सोही दिन अपराह्न ४ बजेपछि मतगणना कार्य सुरु गर्ने जनाएको छ । मतगणना सकिएपछि निर्वाचन परिणाम घोषणा गरिनेछ ।