दोस्रो बाल साहित्य महोत्सव पुस २५मा

३पुस, हेटौंडा। हेटौंडामा दोस्रो बाल कला साहित्य महोत्सव हुने भएको छ।‌

हेटौंडा–४ मा रहेको नवोदय शिशु सदनले विभिन्न संघसंस्थाको सहकार्यमा आगामी पुस २५ र २६ गते दोस्रो बाल कला साहित्य महोत्सव हुने भएको हो। बुधबार  नवोदय शिशु सदनले पत्रकार सम्मेलनको आयोजना गर्दै महोत्सवको बारेमा जानकारी गराएको हो।

पत्रकार सम्मेलनमा बोल्दै विद्यालयका निर्देशक दिपेश जोशिले हेटौंडा उपमहानगरपालिका, काठमाडौं पब्लिकेशन, बाल कला संग्रहालय, सर्जक सञ्जाल मकवानपुर, नेपाल बाल साहित्य समाजको सहकार्यमा बाल कला साहित्य महोत्सवको आयोजना गर्न लागिएको जनाएको छ । महोत्सवमा मकवानपुरका तीन दर्जनभन्दा बढी निजी तथा सामुदायिक विद्यालयका ३ हजार पाँच सयभन्दा बढी विद्यार्थी तथा अभिभावकको सहभागिता रहने जनाएका छन्।

'हामीले कार्यशालाको माध्यमबाट शिक्षक तथा विद्यार्थीको कला साहित्यको सीप तथा सिर्जनात्मक क्षमता अभिवृद्धि गर्ने उद्देश्यका साथ गत वर्षदेखि सुरु भएकोमहोत्सवलाई यसवर्ष पनि निरन्तरता दिन लागेका हौ' जोशिले बताएका छन्।

महोत्सव हेटौंडा ४ कमलडाँडामा रहेको नवोदय शिशु सदनको प्राङ्गणमा हुने र महोत्सवमा नेपाली हास्यव्यङ्ग्य क्षेत्रका प्रतिष्ठित अनुहार मदनकृष्ण श्रेष्ठ र हरिवंश आचार्यको पनि सहभागिता रहनेछ । त्यसैगरी युवा लेखक राधा पौडेल, अमर न्यौपाने लगायतको  सहभागिता रहने बताइएको छ।