नेकपा-राजपा सहमतिप्रति नेता रावलको यस्तो कविता

४ पुस, काठमाडौं । नेपाल कम्युनिस्ट पार्टी (नेकपा) र राष्ट्रिय जनता पार्टी (राजपा) बीच भएको सहमतिलाई लिएर स्थायी कमिटी भीम रावलले व्यांग्यात्मक कविता प्रस्तुत गरेका छन् । 
राष्ट्रियसभाको निर्वाचनमा दुई पार्टीबीच तालमेल भएकोप्रति कटाक्ष गर्दै उनले स्थायी कमिटि बैठकमै कविता सुनाएका हुन् । स्थायी कमिटि बैठक चलिरहेका बेला बैठकलाई जानकारी नदिई नाकाबन्दीका पक्षधरसंग सहमति गरेको भन्दै उनले आक्रोश पोखेका छन् । उनले सत्ता–धन सबैथोक भए चाहियो साम्यवाद किन ? भन्दै शिर्ष नेताहरुलाई कवितामार्फत प्रश्न गरेका छन् ।
यस्तो छ कविता
अँध्यारो अन्तराल चिर्दै बल्छ कि भनी यो दियो
धुम्रबाराहीमा एउटा अभ्यास गरिँदै थियो
एक्कासी धुवाँको मुस्लो बालुवाटारमा उठ्यो
आशाको धिपधिपे पट्ट पानीको फोका झैं फुट्यो
रक्तिम झण्डाको आडमा समाजवाद खोजिँदै थियो
त्यही झण्डा समात्ने हातले आफ्नै काल रोजिँदै थियो
अंकमाल नाकाबन्दीलाई,देशभक्ति कहाँ गयो ?
विधि र पद्धति भन्ने क्षणभरमा नै धूलो भयो
सत्ता–धन सबैथोक भए चाहियो साम्यवाद किन ?
शीर्ष भनी कहलिने नेता हो, इमानले भन
सिद्धान्त,वर्ग,विधिका डम्फु बजाइ राख्न सबै छोडौं
जहाँ पाइन्छ सत्ता,धन,यो जीवन त्यहीँ नै जोडौं !