मानिकलाल स्मृति फुटवलको उपाधि सयपत्रीलाई 

८ फागुन, हेटौंडा । मकवानपुरको पश्चिमी क्षेत्र सरिखेतमा मानिकलाल स्मृति प्रतिष्ठानको आयोजनामा सुरु भएको ४ नम्बर क्षेत्रस्तरीय फुटवल प्रतियोगिताको उपाधि सयपत्री युवा क्लव सुनाचुरीले हात पारेको छ ।
आईतबार भएको फाइनल खेलमा सयपत्री युवा क्लव सुनाचुरीले ताम्सालिङ युवा क्लव कालिकाटारलाई २–० गोल अन्तरले पराजित गर्दै उपाधि चुम्न सफल भएको हो ।
पहिलो हुने सयपत्री युवा क्लवले ३० हजार नगद, सिल्ड र प्रमाणपत्र पाएको थियो भने दोस्रो हुन सफल ताम्सालिङले नगद १५ हजारसहित, सिल्ड र प्रमाणपत्र पाएको थियो ।
त्यसैगरी बेष्ट प्लेयर सयपत्रीका मनिष पौडेल, बेष्ट डिफेन्स र सर्वाधिक गोलकर्ता क्रमशः ताम्सालिङका सन्तोष बस्नेत र सुजन गुरुङ बन्न सफल भएका छन् ।
प्रतियोगिता संयोजक बीरेन्द्र जिम्वाको अध्यक्षतामा भएको समापन कार्यक्रममा प्रमूख अथिति नेपाली काँग्रेसकी केन्द्रीय सदस्य एवं सांसद महालक्ष्मी उपाध्याय डिना, विशिष्ट अथिति काँग्रेस जिल्ला सचिव बुद्ध लामा, निवर्तमान सभापति रघुरमण न्यौपानेले विजयी खेलाडी तथा क्लवलाई पुरस्कार वितरण गरेका थिए ।
कार्यक्रममा जिल्ला सदस्य ईश्वर रुम्बा, महासमिति सदस्य चित्रबहादुर थापा, नेपाल महिला संघकी ४ नम्बर क्षेत्री अध्यक्ष जानकी लामा, शिक्षक संघ सरिखेतका अध्यक्ष मिथुन रुम्बा, सिमन बिक, टेकबहादुर स्याङतानलगायतले मन्तव्य व्यक्त गरेका थिए । प्रतियोगितामा मकवानपुर ४ नम्बर क्षेत्रका १२ टिमले सहभागिता जनाएका थिए ।