भागबन्डामा १४ राजदूत सिफारिस

९ फागुन, काठमाडौं । नेपाल सरकार मन्त्रिपरिषद्को बैठकले सोमबार १४ देशका लागि राजदूत सिफारिस गरेको छ । सरकारले भागबन्डाका अाधारमा १४ देशका लागि राजदूत सिफारिस गरेको हो । नेपाली कांग्रेसबाट ६, माओवादी केन्द्रका ४, राप्रपाको ३ र फोरम लोकतान्त्रिकबाट १ रहेका छन् । 

कांग्रेसको कोटामा श्रीलंकाका लागि अर्थविद् डा. विश्वम्भर प्याकुरेल, बंगलादेशका लागि चिकित्सक डा. चोपलाल भूषाल, म्यानमारका लागि गैरआवासीय नेपाली संघका संरक्षक भीम उदास, दक्षिण कोरियाका लागि पूर्व परराष्ट्र राज्यमन्त्री अर्जुनजंगबहादुर सिंह, कतारका लागि रमेशप्रसाद कोइराला र यूनाइटेड अरव इमिरेट्सका लागि म्यानपावर व्यवसायी आशा लामा रहेकी छिन् ।

माओवादीको तर्फबाट अष्ट्रेलियाका लागि पूर्व सभासद् लक्की शेर्पा, डेनमार्कका लागि राईजिङ नेपालका पूर्व सम्पादक युवनाथ लम्साल, साउदी अरेवीयाका लागि त्रिभूवन विश्व विद्यालयका पूर्व रजिष्टार महेन्द्र सिंह र बहराइनका लागि राज्य पुनर्स‌रचना आयोगका पूर्व अध्यक्ष पदम सुन्दास रहेका छन् । 

राप्रपाबाट स्पेनका लागि पूर्व सैनिक अधिकारी भरत रायमाझी, इजरायलका लागि पूर्व कानुन मन्त्री निरञ्जन थापा र जापानका लागि प्रतिभा राणा रहेका छन् । फोरम लोकतान्त्रिकको तर्फबाट ओमनका लागि शर्मिला पराजुली ढकाल सिफारिसमा परेकी छिन् ।