पर्यटक लोभ्याउदै हेटौँडा ७ न्युरेनीमा रहेको पशुपतिनाथ मन्दिर क्षेत्र

फोटो: सुनिल शिवाकोटी। प्रष्ट खबर

सुनिल शिवाकोटी

१६ पुस, हेटौँडा । हेटौँडा ७ न्युरेनी चिसापानीमा रहेको पशुपित मन्दिर धार्मिक केन्द्रको रुपमा मात्र नभई पर्यटकीय स्थलको हवको रुपमा बिकास हुदै गएको छ । हेटौँडा उपमहानगर भित्र शहरको कोलाहलबाट केही पर रमणीय न्युरेनी सामुदायीक वनको काखमा अवस्थित छ पशुपित मन्दिर क्षेत्र । 

धार्मिक क्षेत्रको रुपमा विकास भएको मन्दिर परिसरमा पछिल्लो समय वनभोज खान र घुम्न आउनेको सख्या दिन प्रतिदिन बढ्दै गइरहेको छ।मन्दिर पसिरबाट सुन्दरतासँगै देखिने हेटौँडा उपमहानगरपालिका वडा नम्बर ६, ७, १५, ८ र हेटौँडा ९कोे मनोरम दृश्यले नै यस क्षेत्रमा घुम्न र वनभोज खान आउने आन्तरिक पर्यटकको सख्यामा बृद्धि हुदै गएको छ। यस क्षेत्र पछिल्लो समय चलचित्र छयाङकनको लागि निर्देशकको रोजाईमा पर्दै आएको छ। कान्ति लोकपथ हुदै हेटौँडा बजारबाट ४ किलोमिटर पारगरेपछि पग्न सकिने पशुपित मन्दिर क्षेत्र धार्मिक पर्यटन तथा वनभोज स्थलको रुपमा बिकास हुदै गएको हो ।

हेटौँडा उपमहानगरपालिका वडा नम्बर ७ र मकवानपुर गढीगाँउपालिका ३ को सिमाना पर्ने यस क्षेत्रमा २०५३ सालमा महादेवको मन्दिर निर्माण गरेर धार्मिक क्षेत्रको रुपमा विकास गरिएको मन्दिर संरक्षण समितिका अध्यक्ष केदार प्रसाद मिश्र बताउछन ।२०५४ सालमा तत्कालीन हेटौँडा नगरपालिकाका मेयर डोरमणी पौडेलले उदघाटन गरेको यस मन्दिरमा हाल धर्मशाला, खानेपानी टयाङ्की, पिकनिक सेड,लक्ष्मी नारायण मन्दिर, वनदेवी मन्दिर, विश्राम स्थल,मयुर प्रतिमा लगायतका संरचना निर्माणले धार्मिक स्थलको रुपमा स्तरउन्नती भई पछिल्लो समय यस क्षेत्रमा वनभोज खान र बैवाहिक कार्यक्रममा समेत मानिसहरु आउने क्रम बढेको मन्दिर संरक्षण समितिका अध्यक्ष मिश्रले बताए । मिश्रले यसै मनोरम दृश्यका कारण नेपाली चलचित्र “चर्खा” यसै क्षेत्रमा छाँयाकन गरिएको समेत बताए ।

शहरको कोलाहलबाट छुट्कारा पाउन नजिकै रहेका सालघारी र न्युरेनी सामुदायीक वनमा देखा पर्ने मयुर,हरिण लगायतका वन्यजन्तु हेर्न पाइने भएपछि हेटौँडा नगरका साथै जिल्ला बाहिरका पर्यटकको आकर्षणको केन्द्रबिन्दु बन्दै गएको छ पशुपित महादेव मन्दिर क्षेत्र ।

नयाँ वर्ष,विभिन्न चाडपर्व, बिदाको समयमा,साउने सोमबार,हरितालिका तिज, बालाचतुदृशी, तथा शिवरात्री मनाउन आउने धर्मालम्वीहरु र पर्यटकहको सख्यामा उल्लेख्य बृद्धि हुदै गएको भन्दै चाँडै मन्दिर परिसरमा वृद्धाश्रम तथा आवश्यक संरचना निर्माणको योजना समेत रहेको मिश्रले बताए। “हामीले स्थानियसंग सहयोग मागेर केही संरचना निमार्ण गरेको हौँ, वडा नम्बर ७ को एक मात्र पर्यटकीय स्थलको रुपमा रहेको र चिनाउन यस क्षेत्रको विकास हुन जरुरी रहेको छ । प्रदेश सरकार नगरपालिका र वडा कार्यालयले यसको विकासमा चासो देखाउनुपर्यौ” मिश्रले बताए।

प्रदेश ३ को राजधानी हेटौँडाबाट विभिन्न सरकारी, गैरसरकारी संघ संस्थाले भिजिट नेपाल ट्वान्टी/ ट्वान्टी मनाइ रहदा हेटौँडा ७ न्युरेनी चिसापानीमा रहेको पशुपित मन्दिर क्षेत्रले पनि समग्र वडा र हेटौँडा नगरको पर्यटन प्रवद्र्धनमा टेवा पुयाउन कोशेढुङ्गा सावित हुन सक्थ्यो की ?