९२ लाख सहित काठमाडौँबाट पक्राउ परे ४ हुण्डी कारोबारी

२१पुस,काठमाडौँ ।काठमाडौंका विभिन्न स्थानमा लामो समय देखि अवैध रुपमा हुण्डी कारोबार गरी राजश्व छली गर्ने ४ जनालाई प्रहरीले पक्राउ गरेको छ ।
महानगरीय अपराध महाशाखा टेकु काठमाडौंले अवैध रुपमा हुण्डी कारोबार गरी राजश्व छली गर्ने ४ जनालाई पक्राउ गरेको जनाएको छ ।
महानगरीय अपराध महाशाखा टेकुबाट गएको प्रहरी टोलीले काठमाडौँको न्युरोड,ताहाचलमा छापा मारेर अवैध रकम हुण्डी कारोबार गरी राजश्व छली गर्ने ४ जनालाई सोमबार पक्राउ गरीएको महाशाखाका सुचना अधिकृत प्रहरी उपरीक्षक मुकेश कुमार सिंहले बताएका छन । 

उपरीक्षक सिंहले प्रहरीले एनएस ट्रेडर्स भोटेवहालमा छापा मार्दा  ट्रेडर्स संचालक काठमाडौं ताहाचल १३ बस्ने  ३४ वर्षका कमल अग्रवाल, सोही स्थानमा रहेको इ–जोन पसलका कर्मचारी इन्द्रचोक बस्ने ३१ वर्षका गोपाल अग्रवाल तथा सिन्धुपाल्चोक मेलम्चीका ३१ वर्षिय भोला नेपाल र  जय दुर्गा ट्रेड इन्टरप्राइजेजका संचालक सुनसरी धरान २ का ५३ वर्षिय नारायण कुमार अग्रवाललाई पक्राउ गरिएको बताए ।
काठमाडौंको न्युरोड क्षेत्र विभिन्न स्थानमा छापा मार्दा नगद, चेक रकम, हस्ताक्षर गरी राखिएको विभिन्न बैंकका चेकबुकहरु, ह्वाट्स्याप र विच्याटमा गरिएको हुण्डी कारोबार सहितको बिबरण बरामद गरिएको प्रहरी उपरिक्षक सिंहले जनाएका छन ।पक्राउ परेका उनिहरुको साथबाट  प्रहरीले नगद १३ लाख ५२ हजार रुपैया र ७८ लाख ५१ हजार उल्लेख गरीएको विभिन्न बैकंको चेक गरी जम्मा ९२ लाख ५१ हजार रुपैया बरामद गरिएको .पक्राउ परेका ४ जनालाई थप कार्वाहरीको लागि राजश्व अनुसन्धान विभाग पुल्चोक पठाईएको उपरीक्षक सिंहले बताएका छन।