मकवानपुरगढी ५ भालुखोलामा महिलाको निशुल्क स्वास्थ्य शिविर

२४पुस, हेटौंडा। मकवानपुर गढी गाउँपालिका ५ मा निशुल्क स्वास्थ्य शिविरको आयोजना गरिएको छ।

मकवानपुरगढी गाउँपालिका वडा ५ भालुखोलामा रहेको श्रीकृष्ण मन्दिर परिसरमा महिलाको निशुल्क स्वास्थ्य शिविर  आयोजना गरिएको हो।  नेपाल ज्योतिष परिषद् मकवानपुरको आयोजनामा भएको शिविरमा  महिलाको स्तन र पाठेघरको परिक्षण गरिएको थियो । 

जसमा १७८ जना महिलाहरुले आफ्नो स्वास्थ्य परिक्षण गराएका थिए । परिक्षण गराएका मध्ये ३ जनामा समस्या देखिएको र ८७ जनामा  पाठेघरमा मातृसुरक्षा ठिक छ कि छैन भन्ने परिक्षण गरिएको छ भने उपकरण अपुगका कारण १० जनालाई भने हेटौंडा अस्पतालमा निशुल्क परिक्षण गराइने आयोजकले जनाएको छ । 

परिषद्को २२ औं स्थापनाको दिवस पारेर  स्वास्थ्य शिविर गरिएको परिषदका सल्लाहकार बासुदेब वत्सले बताए । नेपाल अर्बुद्धरोग निवारण संस्था मकवानपुरको सहकार्यमा बीपी मेमोरियल क्यान्सर अस्पताल भरतपुरका स्त्री रोग विशेषज्ञहरुद्धारा परिक्षण गराइएको थियो । गाउँपालिकाका अध्यक्ष विदुर हुमागाईको प्रमुख अतिथ्यतामा सञ्चालन भएको स्वास्थ्य शिविरमा नेपाल अर्बुद्धरोग निवारण संस्था मकवानपुरका अध्यक्ष कापिला जोशी, निवारणकै केन्द्रीय कोषाध्यक्ष प्रकाश खतिवडा, अस्पतालका डा. अयोध्या पाठक, समाजसेवी कृष्ण प्रसाद सञ्जेल, नेपाल ज्योतिष परिषद्  प्रदेश ३ का उपसचिव गोविन्द सञ्जेल, उज्जवल दुग्द उत्पादक सहकारी का अध्यक्ष विष्णु प्रसाद घिमिरे लगायत विभिन्न टोलविकास संस्थाहरुका प्रतिनिधिहरुको उपस्थिती रहेको थियो ।