सर्वदलीय बैठक निष्कर्षविहिन, मूख्यमन्त्रीको एकमत गराउने प्रयास जारी

२५ पुस, हेटौँडा । मूख्यमन्त्री डोरमणी पौडेलको आह्वानमा ३ नम्बर प्रदेशको राजधानी र नामाकरणको विषयमा बसेको सर्वदलीय बैठक निष्कर्षविहिन टुंगिएको छ । मूख्यमन्त्री निवासमा शुक्रबार बेलुका बसेको सर्वदलीय बैठकमा राजधानी र नामाकरणको प्रस्ताव दर्ता गर्ने विषयमा एकमत हुन नसकेको हो । 
बैठकमा नेकपा संसदीय दलका नेता समेत रहेका मूख्यमन्त्री पौडेलले सबै दल मिलेर स्थायी राजधानी हेटौंडा र नामाकरण वाग्मती राख्न सहमत भै दिन दलका नेताहरुलाई आग्रह गरेका थिए । बैठकमा प्रमुख प्रतिपक्ष दलका नेता इन्द्रबहादुर बानियाँले ऐतिहासिक काममा एकमत भएर अघि बढ्दा राम्रै हुने सुझाव दिएका थिए । बैठकमा नेकपा उपनेता एवं आन्तरिक मामिला तथा कानुनमन्त्री शालिकराम जम्कट्टेल, प्रमुख प्रतिपक्ष दल कांग्रेस संसदीय दलका नेता बानियाँ, राप्रपा संयुक्तका रीना गुरुङ, राप्रपाका रीता माझीको राजधानी हेटौंडा र नाम वाग्मतीमा सहमति जनाएका थिए ।
बैठकमा विवेकशिलका रमेश पौड्याल, साझाका शोभा शाक्य, नेमकिपाका सुरेन्द्रराज गोसाईले यसबारे आफ्नो दलसंग छलफल गरी निर्णय दिने बताएका थिए । प्रष्टखबरसंग कुरा गर्दै विवेकशिलका पौड्यालले आफ्नै दलले यसअघि नै फरक निर्णय गरेकाले मूख्यमन्त्रीको आग्रहमा सहमति जनाउन नसकिएको बताए । उनले आफुले पार्टीका शिर्ष नेतृत्वलाई यसबारे अवगत गराएको भन्दै पार्टीको राय आएपछि थप निर्णय गर्ने बताए ।