रुद्र पाख्रिन र दिलमाया योञ्जनलाई सम्झदै भक्कानिए ‘अभागी सांसद’ (भिडियोसहित)

२७ पुस, हेटौँडा । प्रदेशसभामा शनिबार प्रदेशको नामकरणबारेको छलफल चल्दै गर्दा एक सांसदले आफुलाई ‘अभागी सांसद’को रुपमा प्रस्तुत गर्दै भावुक धारणा राखे । 
यसअघि आफुहरुलाई पहिचान र अग्राधिकारको लागि १० बर्षे सशस्त्र द्वन्दमा होमाईएको र अहिले त्यही मुद्धा त्यो पार्टी (माओवादी) ले छोडेको भन्दै स्वतन्त्र सांसद प्रेमबहादुर तामाङले भावुक मुद्रामा आफ्नो धारणा राखे । उनले द्वन्दका क्रममा ज्यानको बलिदानी दिएका रुद्र पाख्रिन र दिलमाया योञ्जनको सपनालाई स्मरण गर्दै आफुले पहिचानको लागि लड्न खोज्दा साथ नपाएको गुनासो गरे । 
तत्कालिन माओवादीले पहिचानको मुद्धा उठाएपनि शनिबार प्रदेशको नाम ‘नेवा–ताम्सालिङ’ राख्न आफुले दुई जना समर्थक नपाएको गुनासो गरे । दुई जना समर्थक नपाउँदा उनको प्रस्ताव दर्ता हुन सकेको थिएन । आफ्नो मन्तव्यका क्रममा उनको गला समेत अवरुद्ध भएको थियो । 
‘यो सदनमा अग्राधिकार र आत्मनिर्णय अधिकारको कुरा गरेर नथाक्ने ‘राता मान्छे’ हरुको भिड छ तर त्यो उत्पिडित, जाती बर्ग क्षेत्रको आवाजलाई यो सदनमा दर्ज गर्नको निमित्त आज ति मान्छेहरुको एउटा प्रतिनिधिले समर्थक पाएको छैन ।’–उनले भने–‘ फेरी पनि म यो सदनमार्फत ति जनताहरुलाई अनुरोध गर्न चाहन्छु, बेईमान, मुर्ख र ध्रुतहरुले दोबाटोमा छोडेको तपाई सहिदहरु, उत्पिडित बर्ग र क्षेत्रको नासोलाई आज प्रेम तामाङले मुटुमा राखेको छ ।’
हेर्नुस् भिडियो