मगरको हत्या अभियोगमा मकवानपुरका ७ पक्राउ

Google Photo

१ माघ, हेटौंडा । मंगलबार राति आक्रमण गरी एक जनाको हत्या गरेको अभियोगमा मकवानपुरका ७ जनालाई बुधबार प्रहरीले पक्राउ गरेको छ ।
पक्राउ पर्नेमा मकवानपुरको बागमती गाउँपालिका वडा नम्बर २ डोटेका २२ बर्षीय नविन ठाडा मगर, १८ बर्षीय टेकबहादुर ठाडा मगर, ३६ बर्षीय दानबहादुर ठाडा मगर, २६ बर्षीय कृष्णबहादुर ठाडा मगर, २० बर्षीय सूर्यबहादुर ठाडा मगर, २६ बर्षीय विजय ठाडा मगर र २२ बर्षीय शेरबहादुर आले मगर रहेको इलाका प्रहरी कार्यालय चन्द्रपुरका प्रहरी नायव उपरीक्षक हेम बहादुर शाहीले बताए । 
रौतहटको चन्द्रपुर नगरपालिका वडा नम्बर १ कुण्डोमा उनीहरुले ढुंगा, मुडा र घरेलु हतियार प्रयोग गरी आक्रमण गर्दा सर्लाहीको बागमती नगरपालिका वडा नम्बर ९ का ५० बर्षीय जीतबहादुर मगरको मृत्यु भएको थियो । आक्रमणबाट घाइते भएका जीतबहादुरको उपचारका क्रममा मृत्यु भएको हो । आफ्ना भाई हराएपछि खोज्न त्यहाँ पुगेका जीतबहादुरलाई चोर्न आएको आशंकामा स्थानीयले आक्रमण गरेको जनाईएको छ । उनीहरुलाई कर्तव्य ज्यान मुद्धामा म्याद थप गरी अनुसन्धान थालेको प्रहरी नायव उपरीक्षक शाहीले बताए ।
घटनास्थल मकवानपुर र रौतहटको सिमानामा पर्ने प्रहरीले जनाएको छ ।