पिप्ले क्याम्पाडाँडा पूर्व प्रहरीको गस्ति कम भएको गुनासो

५ माघ, हेटौँडा । हेटौँडा–५ पिप्ले क्याम्पाडाँडाभन्दा पूर्व प्रहरीको गस्ति कम हुने गरेको भन्दै स्थानीयले गुनासो गरेका छन् ।

शनिबार विहान क्याम्पाडाँडामा शव फेला परेपछि स्थानीय असुरक्षित महसुस गर्दै यस्तो गुनासो गरेका हुन् । ‘पिप्लेसम्म त प्रहरी सडकमा देखिन्छ, तर त्यस उता प्रहरी उपस्थिति सडकमा हुँदैन ।’–एक स्थानीयले भने । विगतमा क्याम्पाडाँडा, चौघडा क्षेत्रमा प्रहरीको गस्ति हुने गरेपनि अहिले त्यो निकै कम भएको छ । बेलुकी ९ बजेपछि विहान ५ बजेसम्म पिप्ले पूर्व प्रहरीको उपस्थिति कतै नदेखिने गरेको हेटौँडा औद्योगिक क्षेत्रमा जागिर गर्ने एक मजदुरले बताए । ‘चौघडा चौकी अगाडि चेकपोष्ट छ, तर त्यहाँ अहिलेसम्म प्रहरी बसेको देखेको छैन ।’–उनले भने–‘न बेलुका ९ बजेपछि चौघडा चौकीको गस्ति कतै हुन्छ ।’ चौघडामा अहिले प्रहरीको सुविधा सम्पन्न भवन बनेको छ । 
विगतमा निकै कष्टका साथ बस्नुपर्दा समेत प्रहरीले चौघडा, चुच्चेखोला, कुमलटार, पुतलीबजार, हात्तिलेट, रंगशाला, रामनगर क्षेत्रमा विहान, दिउँसो र बेलुका गस्ति गरेको स्थानीयको अनुभव छ । तर पछिल्लो समय प्रहरीले गस्ति गरेको स्थानीयले देख्न पाएका छैनन् । पछिल्ला प्रहरी सहायक निरीक्षक उपेन्द्र यादव र विरेन्द्र खड्काले चौघडा क्षेत्रमा गर्ने गरेको गस्ति अहिले पनि चौघडाबासी सम्झने गर्दछन् । ‘यि दुई असई हुँदा लागुऔषध दुव्र्यसनी रहने सम्भव्य क्षेत्रदेखि सडकमा प्रहरी उपस्थिति र बेलुका नियमित गस्ति हुन्थ्यो ।’–चौघडाका एक युवाले भने–‘अहिले कुनै घटना भएमात्रै प्रहरी पोशाक लगाएर मोटरसाइकल दौडाएको देखिन्छ ।’ नियमित गस्ति गर्दैन भने प्रहरीले के गर्छ भन्दै उनले प्रश्न गरे । मुल सडकमा शव भेटिन थालेपछि आफुहरु चिन्तित बनेको स्थानीयको गुनासो छ । चौघडा चौकीले यस क्षेत्रको शान्ति सुरक्षाका लागि स्थानीयसंगको समन्वयमा सुरक्षा रणनीति तयार गर्नुपर्ने स्थानीयको भनाई छ ।
हेटौँडा वडा नम्बर ६ का वडा अध्यक्ष अर्जुनप्रसाद चौलागाईले शान्ति सुरक्षाको प्रत्याभुति दिनु प्रहरीको दायित्व भएको भन्दै आफुले यसबारे सम्बन्धित निकायसंग कुरा गर्ने बताए । क्याम्पाडाँडादेखि ६ नम्बर वडा क्षेत्रको सुरक्षाको लागि विशेष चनाखो रहन प्रहरीसंग समन्वय गर्ने उनको भनाई छ ।